Malamai addinin Musulunci sama da 1,000 sun buƙaci Shugaban Ƙasa Bola Ahmed Tinubu da ya janye ƙudurinsa na sake neman takara a zaɓen shugaban ƙasa na 2027, saboda matsin tattalin arziƙi, rashin tsaro da sauran ƙalubalen da ’yan Nijeriya fuskanta.
Malaman sun bayyana hakan ne cikin wata sanarwa da suka fitar bayan wani taron ƙasa da aka gudanar a Kano ranar Lahadi.
Taron ya tattauna halin da ƙasar ke ciki a ƙarƙashin gwamnatin Tinubu da kuma zaɓen 2027.
Malaman, ƙarƙashin ƙungiyar Ko Da Naka…For the Struggle to Promote Good Governance and Community Development, tare da haɗin gwiwar AFAQ Educational Foundation, sun soki wasu manufofin tattalin arziƙin gwamnatin Tinubu.
Sun ce cire tallafin man fetur, sauye-sauyen tsarin canjin kuɗi, ƙarin kuɗin wutar lantarki da sauye-sauyen haraji sun ƙara jefa talakawa cikin wahala.
Sun buƙaci gwamnati ta sake duba waɗannan manufofi tare da magance tsadar rayuwa da rashin aikin yi.
Sun kuma yi gargaɗin cewa idan ba a sauya manufofin ba, ya kamata ’yan Nkjeriya su ƙi goyon bayan neman Tinubu ya sake komawa kan kujerar shugaban ƙasa.
Malaman sun kuma nuna damuwa kan kashe-kashe, garkuwa da mutane da ayyukan ta’addanci da ke faruwa a sassa daban-daban na ƙasar, musamman yankin Arewa maso Yamma.
Sun buƙaci gwamnati ta ɗauki matakan gaggawa domin inganta tsaro.
A ƙarshe, malaman sun shawarci Tinubu da ya janye daga takarar 2027, suna cewa idan ya ƙi, ya kamata ’yan Nijeriya su ƙi zaɓensa tare da zaɓar shugabannin da suke ganin za su iya samar da ingantaccen shugabanci.
