Alkaluman tattalin arziki na watanni 7 na farkon shekarar da muke ciki da gwamnatin kasar Sin ta fitar kwanan nan, sun yi nuni da cewa, tsakanin watan Janairu zuwa Yulin bana, wasu muhimman mizanai na tattalin arzikin kasar da suka shafi sana’o’in kere-kere da hidimomi da kasuwancin waje, duk sun samu ci gaba, kuma tattalin arzikin kasar ya habaka ta hanyar da ta dace, wanda ke da makoma mai haske.
Manazarta na ganin cewa, al’amarin ya shaida ci gaban tattalin arzikin kasar Sin mai matukar dorewa da kuzari, wanda ya kuma taimaka sosai ga habakar tattalin arzikin duk duniya.
Mene ne sirrin ci gaban tattalin arzikin kasar Sin babu tsayawa kuma ta hanyar da ta dace? Sannan kuma daga ina ya samo karfi?A ganin farfesa Wang Xiaosong na tsangayar tattalin arziki ta jami’ar Renmin ta kasar Sin, ganin yadda ake fuskantar kalubale daga waje da wahalhalu na cikin gida a watanni 7 na farkon bana, mahukuntan kasar Sin suka yi tunani mai zurfi da hangen nesa, har suka kara daukar matakan da suka dace, da zurfafa yin kwaskwarima gami da fadada bude kofa ga kasashen waje, inda kuma bangarori daban-daban na kasar suka himmatu wajen samar da ci gaba mai inganci bisa kirkire-kirkiren kimiyya da fasaha. Kazalika, tushen tattalin arzikin kasar Sin ya kara inganta, wanda ke da dorewa da makoma mai haske, al’amarin da ya taimaka sosai ga magance hadurra iri-iri, da samun ci gaba ba tare da matsala ba. (Murtala Zhang)
