“Nuna juriya”, da “Wuce tsammani”, da “Iya cimma burin ci gaban tattalin arziki na shekara cikin nasara”, kalamai ne da kafofin yada labarai na kasa da kasa da dama suka furta, bayan da gwamnatin Sin ta fitar da sakamakon ayyukan tattalin arziki na rabin farkon shekarar nan a jiya Laraba.
Bisa kididdiga ta matakin farko, GDPn kasar Sin a rabin farko na bana ya kai yuan tiriliyan 69.5704, wanda ya karu da kashi 4.7% idan aka kwatanta da makamancin lokacin bara, bisa la’akari da farashin da ba ya canzawa, wanda ya sa Sin ta kasance a kan gaba tsakanin kasashe masu karfin tattalin arziki a duniya.
Wannan ba wai kawai ya aza tushe mai kyau na cimma burin shekara ta farko ta aiwatar da shirin raya tattalin arziki da zamantakewar al’umma na shekaru biyar-biyar karo na 15 ba ne, har ma ya kara kwarin gwiwa da karfi ga ci gaban tattalin arzikin duniya.Tun farkon wannan shekara, yanayin kasa da kasa ya kasance cikin rudani da sauye-sauye, kuma ci gaban tattalin arzikin duniya ya nuna sanyin jiki baki daya.
Asusun ba da lamuni na kasa da kasa IMF, a kwanan nan ya sake rage hasashen bunkasar tattalin arzikin duniya na shekara ta 2026 zuwa kashi 3.0%, yayin da ya kara hasashen bunkasar tattalin arzikin Sin zuwa kashi 4.6%. Sabon rahoton tattalin arzikin Sin na rabin shekara ya wuce tsamanin kasashen waje, wato tattalin arzikin Sin ya jure matsin lamba, kuma ya ci gaba da tafiya ba tare da tangarda ba, tare da kara kuzari don samun ci gaba mai kirkire-kirkire da inganci.
To, ko me ya sa kasar Sin ta iya samun wannan nasara cikin mawuyancin hali? Shugaban cibiyar nazarin ka’idojin bude kofa ga ketare na Sin na jami’ar cinikin waje Sang Baichuan, ya shaida wa manema labarai cewa, tun farkon wannan shekara, Sin ta himmatu wajen inganta samun ingantaccen ci gaba, ta kuma bunkasa sabon karfin samar da kayayyaki, da hidimomi bisa la’akari da yanayin yankunanta, tare da aiwatar da manufofin tattalin arziki masu karfi, da inganci daga manyan fannoni, wanda hakan ya magance matsin lamba daga waje yadda ya kamata.
A lokaci guda kuma, kamfanoni sun dauki matakan yin kirkiri. Bugu da kari, ingantaccen karfin juriyar tattalin arzikin Sin, da kyakkyawar makomarsa mai haske, duk sun tallafa wajen inganta nagarta da girman ci gaban tattalin arzikin kasar ta Sin. (Amina Xu)
