Ƙungiyoyin ƙwadago na jihohi sun fara matsa wa gwamnonin jihohinsu lamba domin su amince da biyan ma’aikata tallafin sufuri naira 70,000 a kowane wata, bisa tsarin da Gwamnatin Tarayya ta amince da shi na tsawon watanni shida, daga Nuwamba 2026. Wannan mataki ya biyo bayan yarjejeniyar da Gwamnatin Tarayya ta cimma da Ƙungiyar Ƙwadago ta Nijeriya (NLC) domin rage raɗaɗin tsadar rayuwa ga ma’aikata.
A Jihar Legas, shugabar NLC ta jihar, Agnes Sesi, ta ce ƙungiyar za ta nemi gwamnatin jihar ta biya ma’aikata tallafin naira 100,000 a kowane wata, bisa la’akari da tsadar sufuri, gidaje da abinci a jihar. Ta ce idan gwamnati ba za ta iya ƙara adadin tallafin ba, bai kamata ta biya ƙasa da naira 70,000 da aka amince da shi a matakin tarayya ba. Ta kuma buƙaci a fara biyan tallafin ba tare da jinkiri ba, domin kada ya taru ya zama bashi.
A Kaduna, shugaban NLC na jihar, Ayuba Magaji, ya ce ƙungiyar za ta rubuta wa Gwamna Uba Sani domin fara tattaunawa kan biyan aƙalla naira 70,000 ga kowane ma’aikaci a kowane wata. Ya ce wannan adadi ne farkon tattaunawar, kuma ƙungiyar za ta nemi ƙarin kuɗi idan ƙarfin tattalin arziƙin jihar ya ba da dama. A Binuwai kuwa, shugaban NLC na jihar, Terungwa Igbe, ya ce ƙungiyar za ta dage kan biyan adadin da aka amince da shi, duk da cewa gwamnatin jihar ta ce ba ta fara tattaunawa ta musamman kan batun ba.
A Kebbi, NLC ta fara neman goyon bayan ƴan Majalisar Dokokin jihar domin tabbatar da biyan tallafin da zai kasance tsakanin naira 40,000 da 70,000, gwargwadon ƙarfin kuɗin gwamnati da nau’in ma’aikata. A Bayelsa, ƙungiyar ta ce bai kamata a ware jihar daga shirin ba, yayin da ƙungiyoyin ƙwadago a Ondo, Edo, Ribas, Gombe da Neja suka bayyana shirinsu na tattaunawa da gwamnatocin jihohinsu kan aiwatar da tallafin.
Sai dai ba duk ƙungiyoyin ƙwadago ne suka gamsu da tsarin tallafin ba. Shugaban TUC na Jihar Ribas, Samuel Ogan, ya bayyana cewa tallafin na watanni shida kaɗai ba zai magance matsalar tsadar rayuwa ba, don haka ya buƙaci a ƙara albashi maimakon dogaro da tallafin wucin-gadi. A Abia kuwa, NLC ta ce za ta nemi a biya tallafin na watanni shida, amma ba za ta bari hakan ya kawo cikas ga tattaunawar sabon mafi ƙarancin albashi ba.
A Kano da Sakkwato, shugabannin NLC na jihohin, Kabiru Inuwa da Abdullahi Jungle, sun ce suna jiran takardar umarni daga hedikwatar ƙungiyar ta ƙasa kafin su fara tattaunawa da gwamnatocin jihohinsu. A Ogun kuwa, TUC ta ce tana tattaunawa da gwamnati kan faɗaɗa tallafin sufuri naira 10,000 da ake bai wa ma’aikatan gwamnati.
Wannan na zuwa ne bayan Gwamnatin Tarayya ta amince da tallafin naira 70,000 ga ma’aikatan gwamnati na watanni shida, amma aiwatar da shi a jihohi yana buƙatar tattaunawa da amincewar gwamnatocin jihohin.
