Gwamnatin Jihar Zamfara ta tabbatar da samun mutane 38 da suka kamu da wata cuta da har yanzu ba a gano nau’inta ba a wasu yankunan jihar, lamarin da ya sa hukumomin lafiya tura tawagar gaggawa domin gudanar da bincike da daƙile yaduwarta.
Rahoton da Cibiyar Kula Da Ayyukan Gaggawa Kan Lafiyar Jama’a (PHEOC) na Ma’aikatar Lafiya ta jihar ta fitar ya nuna cewa an samu mafi yawan masu fama da cutar ne a ƙaramar hukumar Shinkafi, yayin da aka samu ƙarin wasu da suka kamu da ita a Moriki, da ke ƙaramar hukumar Zurmi. An tattara waɗannan alkaluma ne zuwa ranar 29 ga Oktoba, 2026.
Ma’aikatar Lafiyar ta bayyana cewa waɗanda suka kamu da cutar na fama da zazzaɓi, da ciwon kai, da rashin sha’awar cin abinci, da amai, da ciwon gaɓoɓin jiki da kuma raunin jiki gaba ɗaya.
Binciken farko da likitoci suka gudanar ya nuna yiwuwar cututtukan zazzabin cizon sauro, ko gastroenteritis (cutar da ke shafar ciki da hanji) ko sankarau ne ke haddasa matsalar, sai dai har yanzu ba a tabbatar da ainihin musabbabinta ba.
Domin gano tushen cutar, gwamnati ta tura tawagar ƙwararrun ma’aikatan lafiya ƙarƙashin jagorancin Daraktan Kiwon Lafiyar Jama’a, Dakta Yusuf Abubakar. Tawagar na duba marasa lafiya a asibitocin Shinkafi da Moriki, tare da raba magunguna da kayan aikin jinya. Haka kuma, an tattara samfuran jinin da sauran bayanan marasa lafiyar domin gudanar da gwaje-gwajen a ɗakin bincike a Sakkwato.
Kwamishiniyar Lafiya ta jihar, Dakta Nafisa Maradun, ta shawarci mazauna yankunan da abin ya shafa da su garzaya asibiti da zarar sun fara ganin alamomin cutar. Ta kuma gargaɗe su kan guje wa shan magani da kansu ba tare da shawarar likita ba, tare da kira ga jama’a da su ba jami’an lafiya haɗin kai yayin da ake ci gaba da bincike.
