Peng Liyuan, uwargidan shugaban kasar Sin, Xi Jinping, ta halarci wani taron da Aigul Japarova, uwargidan shugaban kasar Kyrgyzstan, Sadyr Japarov, ta shirya da safiyar yau Talata domin matan shugabannin da ke halartar taron kolin Kungiyar Hadin Gwiwa ta Shanghai (SCO) na shekarar 2026.
Bayan isarta gidan gwamnati na Ala-Archa, Japarova ta yi wa Peng kyakkyawar tarba. Kana Peng da sauran matan shugabanni daga kasashen da abin ya shafa, sun duba wani baje kolin al’adun kabilun Kyrgyzstan tare da daukar hotuna na rukuni, kafin su kalli wani wasan nishadi na dandamali a zauren tarbar baki na Enesay.
Peng ta bayyana cewa, wasan ya yi matukar kayatarwa, inda ta yaba wa ‘yan wasan bisa bajintar da suka nuna ta musamman. Ta kuma gayyaci ‘yan wasan nishadin na Kyrgyzstan zuwa kasar Sin domin gudanar da karin wasanni da musayar al’adu, ta yadda za a bai wa ‘yan kallo na kasar Sin damar kara fahimtar al’adun kabilun kasar ta Kyrgyzstan masu dumbin tarihi da ban sha’awa. (Abdulrazaq Yahuza Jere)
