Rundunar sojin ’yantar da jama’ar kasar Sin ta PLA da ke yankin kudancin kasar, ta bayyana a yau Litinin cewa, kasar Philippines ta keta ka’ida inda ta shiga sararin samaniyar Sin, kuma ta yi wa Philippines din gargadin dakatar da ayyukanta na keta hakkoki da takalar fada.
Kakakin rundunar Zhai Shichen, ya bayyana cikin wata sanarwa cewa, jirgin saman kasar Philippines na C-208 ya kutsa sararin samaniyar Sin ba bisa ka’ida ba, ta saman yankin Huangyan Dao, ba tare da izinin gwamnatin Sin ba.
Ya ce sojojin ruwa da na sama da rundunar ta tura, sun bibiyi jirgin na Philippines tare da yi masa gargadin ficewa kamar yadda dokoki da ka’idoji suka tanada.
A cewar kakakin, yankin Huangyan Dao mallakin kasar Sin ne, yana cewa “muna gargadin bangaren Philippines da ya dakatar da ayyukan take hakkoki da takala nan take.” (Fa’iza Mustapha)
