Kakakin ma’aikatar harkokin wajen kasar Sin Guo Jiakun, ya amsa tambayoyin ‘yan jarida game da ganawar da shugaba Xi Jinping ya yi da takwaransa na Amurka Donald Trump a safiyar yau din, inda bangarorin biyu suka cimma yarjejeniya kan gina sabon matsayin “dangantaka mai dorewa, da amfani bisa manyan tsare-tsare tsakanin Sin da Amurka”, matakin da zai samar da jagoranci bisa hangen nesa ga dangantakar Sin da Amurka cikin shekaru 3 masu zuwa, har ma da makoma ta dogon lokaci.
Guo Jiakun, wanda ya gana da ‘yan jaridun a yau Alhamis 14 ga wata, ya ce irin wannan hulda ya kamata ta gudana bisa tushen hadin gwiwa, da yin takara cikin iyaka, kuma bisa kwanciyar hankali da dorewa, wanda hakan zai iya bayar da damar shawo kan sabanin ra’ayi. Ya ce bangaren Sin yana fatan raya huldar Sin da Amurka zuwa sabon matsayin hadin gwiwa, da kuma ciyar da dangantakarsu gaba cikin lumana, lafiya da ci gaba mai dorewa.
Wani dan jarida ya gabatar da tambaya game da batun yankin Taiwan, kuma Guo Jiakun ya bayyana cewa, yayin tattaunawarsu, shugaba Xi ya nuna cewa, batun Taiwan shi ne mafi muhimmanci a cikin dangantakar Sin da Amurka. Idan an magance shi da kyau, dangantakar kasashen biyu za ta ci gaba da zama cikin yanayi na kwanciyar hankali gaba daya, amma idan ba haka ba, kasashen biyu za su yi karo da juna ko ma su tsunduma cikin rikici, wanda zai jefa dangantakarsu cikin wani yanayi mai hadari.
Bugu da kari, Guo Jiakun ya ce “‘Haifar da baraka a Taiwan” ya sabawa burin zaman lafiya a mashigin tekun Taiwan. Kana kiyaye zaman lafiya da kwanciyar hankali a mashigin tekun Taiwan, shi ne muradin bai daya mafi muhimmanci ga kowannen bangare na Sin da Amurka, kuma ya kamata Amurka ta yi taka-tsantsan sosai kan batun yankin Taiwan na Sin. (Amina Xu)
