Mai magana da yawun ma’aikatar harkokin wajen kasar Sin Guo Jiakun, ya ce kasar Sin na bayyana matukar adawa da matakin Amurka, na sayarwa yankin Taiwan na Sin makamai.
Kuma wannan matsaya ta Sin a bayyane take.
Guo Jiakun, wanda ya bayyana hakan a jiya Talata, yayin da yake martani dangane da wasu rahotanni dake cewa a kwanan nan, yankin Taiwan ya karbi wasu jiragen sama na yaki biyu samfurin F-16V da ya sayo daga Amurka, tare da shirin karbar wasu jiragen 64 cikin wannan shekara.
Guo, ya ce kamata ya yi bangaren Amurka ya aiwatar da muhimman matsayar fahimtar juna da shugabannin Sin da Amurka suka cimma yayin tattaunawar da suka yi a baya, ya kuma rungumi manufar kasar Sin daya tak a duniya, da jerin sanarwar bayan taro guda uku da sassan biyu suka fitar cikin hadin gwiwa, kana ya aiwatar da matakai na hangen nesa dangane da batun Taiwan.
Jami’in ya ce “batun Taiwan harka ce ta cikin gidan kasar Sin, kuma yadda za a warware batun harka ce ta al’ummar Sin su kadai, wadda ba ta bukatar tsoma baki daga waje.” (Saminu Alhassan)
