Kasar Sin ta karbi shaidu daga Rasha, dangane da tawagar aikin sojin kasar Japan mai lamba 731, rukunin da ya kware wajen amfani da kwayoyin cuta domin yaki, a yayin yakin duniya na biyu.
A cewar hukumar koli ta tattara kayan tarihi, Sin ta samu kwafin bayanai, ciki har da takardun shari’u da aka yiwa dakaru membobin tawagar ta 731, da rahotannin bincike dangane da laifukan da tawagar ta tafka, da takardun musayar bayanan hukuma na tsohuwar tarayyar Soviet, tsakanin 11 ga watan Mayun shekarar 1939 zuwa ranar 25 ga watan Disamban 1950.
Yayin yakin duniya na biyu, dakarun mamaya na kasar Japan, sun kafa wata cibiyar amfani da kwayoyin cuta domin yaki a sassa daban daban na Asiya, inda ta kafa tawaga mai lamba 731 a birnin Harbin, na lardin Heilongjiang dake arewa maso gabashin kasar Sin, wurin da ta rika gwajin nau’o’in kwayoyin cuta kan bil’adama.
A kalla Sinawa, da al’ummun tarayyar Soviet, da na wasu kasashe da yankuna har mutane 3,000, tawagar ta 731, ta yi gwajin kwayoyin cututtuka masu hadari a kansu. (Mai fassara: Saminu Alhassan)
