Sojojin Operation Fansan Yamma sun ceto wani mutum mai shekaru 40 da aka sace, tare da ƙwato shanu 18 da aka sace, sannan sun kama wasu mutane huɗu da ake zargi da safarar miyagun ƙwayoyi a wasu ayyuka daban-daban a Jihar Kebbi.
Sojojin sun ce ayyukan sun gudana ne a ranar Lahadi, 18 ga watan Oktoba, bayan wasu ’yan ta’adda da ake zargi sun kai hari ƙauyen Rambo da ke Ƙaramar Hukumar Danko-Wasagu.
Sojoji da ’yan sa-kai na yankin sun yi musayar wuta da maharan, lamarin da ya tilasta musu tserewa.
Daga nan ne suka ceto mutumin da aka sace, mai suna Suleiman Maiyaki Ikara, tare da ƙwato shanun.
Daga bisani, an miƙa mutumin da aka ceto da shanun ga shugaban ƙauyen domin ɗaukar matakan da suka dace.
A wani aiki na daban, sojoji tare da jami’an Hukumar Hana Sha da Fataucin Miyagun Ƙwayoyi ta Ƙasa (NDLEA) sun kama wasu mutane huɗu yayin samamen da suka kai wasu wurare a ƙauyukan Dakin Kowa, Karaye da Gubba, da ke Ƙaramar Hukumar Maiyama.
Sun kuma ƙwato wasu miyagun ƙwayoyi a yayin samamen.
Sojojin sun yi kira ga al’ummar yankin da su riƙa kai wa jami’an tsaro sahihan bayanai cikin gaggawa domin taimakawa wajen yaƙi da matsalar tsaro.
