Dakarun Operation Fansan Yamma sun ceto matafiya 49 ‘yan asalin Jihar Kano, bayan da wasu da ake zargin masu garkuwa da mutane ne suka kai musu hari a Jihar Zamfara.
Matafiyan na kan hanyar dawowa daga ƙasar Senegal ne, inda suka je halartar wani taron Mauludi.
Mai sharhi kan harkokin tsaro, Zagazola Makama, ne ya bayyana lamarin a wani saƙo da ya wallafa a shafinsa na X jiya Talata.
A cewar saƙon, waɗanda abin ya shafa sun fuskanci harin masu garkuwa da mutane ne bayan motar da suke ciki ta samu matsala yayin da suke tafiya a yankin.
Saƙon ya ce dakarun sun gaggauta kai ɗauki tare da ceto dukkan matafiya 49 daga hannun waɗanda ake zargin masu garkuwa da mutane ne.
Daga bisani, an miƙa matafiyan ga Shugaban Ƙaramar Hukumar Tsafe, Malam Garba Shehu Fanchers, da daddare, domin a kula da lafiyarsu tare da gudanar da binciken lafiyar su.
Ana sa ran hukumomin ƙaramar hukumar za su taimaka wajen tabbatar da dawowar matafiyan lafiya da haɗa su da iyalansu bayan kammala binciken da ya dace.
