Tawaga ta 42 ta masu binciken kimiyya ta Sin, ta kammala ayyukanta a yankin kankara na Antarctic cikin nasara tare da kafa sabon tarihi. Tawagar ta yi amfani da jirgin ruwa na aikin fasa kankara mai suna Xuelong, kuma bayan kammala ayyukanta ana sa ran a yau Alhamis tawagar za ta dawo gida kamar yadda aka tsara.
Ma’aikatar lura da albarkatun kasa ta kasar Sin ce ta tsara aikin binciken a yankin kankara na Antarctic, kuma bisa ayyukan da tawagar ta aiwatar, ta cimma sabbin nasarori ta fannin amfani da karin jami’ai, da tsare-tsaren aiki da ma fadin ayyukan da aka kammala.
Tawagar ta yi nasarar haka kankara da zurfinta ya kai mita 3,413 daga saman tafkin kankara na Qilin, dake gabashin Antarctica a ranar 5 ga watan Fabarairun bana, zurfin da ya zarta mita 2,540 da masu bincike na kasa da kasa suka taba kaiwa a baya.
Hakan a cewar tawagar ya shaida ikon kasar Sin na gudanar da aikin bincike mai nasaba da hakar kankara a sama da kaso 90 bisa dari na yankunan kankarar Antarctic da dukkanin sassan yankin Arctic. (Saminu Alhassan)
Discussion about this post