Shugaban Ƙasa, Bola Ahmed Tinubu, ya naɗa Farfesa Segun Aina a matsayin sabon shugaban Hukumar Shirya Jarabawar Shiga Manyan Makarantu (JAMB).
Aina zai karɓi ragamar shugabancin hukumar daga hannun Is-haq Oloyede, wanda wa’adinsa na biyu zai ƙare a ranar 31 ga watan Yuli, 2026.
Mai magana da yawun shugaban ƙasa, Bayo Onanuga, ne ya bayyana hakan a ranar Alhamis, inda ya ce Aina ƙwararre ne a fannin fasaha, tsara jarabawa da gyaran cibiyoyin gwamnati.
Farfesa Aina, wanda zai cika shekara 40 a watan Yuli, ya yi karatun Kimiyyar Fasaha a Jami’ar Kent da ke Birtaniya.
Haka kuma ya samu digiri na biyu da digirin digirgir daga Jami’ar Loughborough.
A yanzu haka shi Farfesa ne a fannin Injiniyan Kwamfuta a Jami’ar Obafemi Awolowo, kuma ya taɓa aiki da JAMB lokacin yi wa ƙasa hidima (NYSC).
Fadar shugaban ƙasa ta ce Aina yana da ƙwarewar aiki ta sama da shekaru 15, inda ya yi aiki tare da hukumomin jarabawa irin su NECO da NABTEB kan tsarin fasahar zamani da gyaran tsarin gudanar da jarabawa.
Sanarwar ta ƙara da cewa Shugaba Tinubu na sa ran sabon shugaban JAMB ɗin zai yi amfani da ƙwarewarsa da iliminsa wajen ƙara inganta ayyukan hukumar tare da ci gaba da gyaran da magabacinsa ya faro.
