An bude babban taron AI na duniya na shekarar 2026 da kuma babban taron kula da tafiyar da harkokin AI na duniya a yau 17 ga watan Yuli a birnin Shanghai dake gabashin Sin. Shugaban kasar Xi Jinping ya halarci bikin bude taron, kuma ya yi jawabi na musamman.
Xi ya nuna cewa, kungiyar hadin gwiwar fasahar AI ta duniya ta kafu a birnin Shanghai karkashin kokarin bangarori daban-daban. Lamarin zai kasance wani muhimmin mataki da Sin ta dauka wajen amsa kiran kasashe masu tasowa da kuma hada kan al’ummomin duniya ta yadda za a bunkasa AI da kuma sarrafa ta, ba shakka hakan zai kafa muhimmin tarihi a bangaren AI.
Xi ya sanar da cewa, a cikin shekaru biyar masu zuwa, kasar Sin za ta ba da horo na musamman kan AI ga mutane 5,000 daga kasashe masu tasowa don kara tallafa wa bunkasa AI a duniya da inganta karfin AI, za ta kuma gina cibiyoyin hadin gwiwar ayyukan AI na duniya ga ASEAN, da kungiyar hadin kan kasashen Larabawa (LAS), da kungiyar Tarayyar Afirka (AU) da kungiyar hadin kan kasashen Latin Amurka da Caribbean (CELAC), da kungiyar hadin kan kasashe ta Shanghai (SCO) da kuma kasashen kawancen BRICS.
Haka nan, Sin za ta kuma inganta aiwatar da shirin gargadi kan yanayi mai amfani da fasaha da ake kira “Mazu” a kasashe 30, domin kare lafiyar al’umma da zaman lafiya a duniya.Kazalika, a yayin taron, hukumar samar da ci gaba da yin kwaskwarima ta kasar Sin tare da wasu hukumomi sun fitar da “Shirin aiki na hadin gwiwar ci gaban AI”. (Amina Xu)
