Miyar Margi na daga cikin shahararrun nau’ikan abin ci da ake yi a yankin Adamawa musamman wajen Yola. Wannan miya tana da dandano na musamman saboda amfani da kifin tarwada da kayan kamshi masu kara armashi.
Abubuwan da ake bukata:
Kifin Tarwada mai kyau, Ganyen Yakuwa ko kubewa, Albasa,
Attarugu da Tattasai, Kayan yaji, Gishiri, Magi, Man gyada kadan,
Kuli-kuli dan kadan, Garin Gero ko Masara domin kauri.
Yadda Ake hadawa:
Da farko za a gyara Kifi Tarwada sannan a wanke shi da ruwa mai tsafta. Bayan haka a zuba shi cikin Tukunya tare da albasa, gishiri da kayan yaji domin ya dan tafasa.
A gefe guda kuma, a daka tattasai, attarugu da albasa tare. Bayan kifin ya kusa dahuwa, sai a zuba wannan malkadadden kayan miya cikin Tukunya.
Daga nan sai a saka ganyen yakuwa ko kubewa bayan an wanke su sosai. A rage mata wuta, a bar miyar ta dan dahu a hankali domin kayan hadin su hadu da kyau.
Ana iya zuba dan man gyada kadan domin kara dandano da kamshi. Wasu kuma kan saka Kuli-kuli domin ya kara armashi ga miyar.
A karshe sai a dan zuba garin gero ko masara da aka gauraya da ruwan domi, domin miyar ta yi kauri yadda ake so. A bar ta ta tafasa na ‘yan mintuna kafin a sauke.
Yadda Ake Ci:
Miyar Margi ta ’yan Yola tana da dadi sosai idan an ci ta da tuwon masara ko tuwon gero. Wannan miya tana daga cikin abin cin gargajiya da ke nuna al’adun mutanen Adamawa da kuma kwayukan su wajen sarrafa abin ci mai armashi.
Discussion about this post