Darajar Naira ta ɗan yi rauni a kan dalar Amurka a kasuwar musayar kuɗaɗen waje ta hukuma, inda aka ƙare cinikinta a kan N1,362.21 kan kowace dala, idan aka kwatanta da N1,358.75 da aka samu a farashin da ya gabata, kamar yadda bayanan CBN ya nuna.
Rahoton ya nuna cewa darajar dala na tsakanin N1,360 da N1,366 a ranar, yayin da yawan kuɗaɗen da aka yi mu’amala da su ya ragu da sama da kashi 37 cikin 100. An yi cinikin dala miliyan 73.57 ne kacal a yarjejeniyoyi 90, idan aka kwatanta da dala miliyan 128.17 da aka yi ciniki da su a zaman baya.
Masana sun danganta wannan koma baya da raguwar shigowar daloli daga masu zuba jari na ƙasashen waje, wanda ya rage sha’awar masu zuba jari ga kadarorin da aka tanada da Naira.
Sai dai duk da matsin lambar da ake fuskanta a kasuwar canjin kuɗi, asusun ajiyar kuɗaɗen waje na Nijeriya ya haura dala biliyan 50, mafi yawa tun bayan sauye-sauyen tsarin musayar kuɗin waje da gwamnatin shugaba Tinubu ta yii.
Masana na ganin hakan zai ƙara ƙarfin CBN wajen tabbatar da daidaiton kasuwar musayar kuɗi da kuma ƙara wa masu zuba jari kwarin gwiwa.
Discussion about this post