Assalamu alaikum masu karatu, barkanmu da sake haduwa daku a Wannan makon a cikin shirin na mu mai farin jini da albarka na Girki Adon Mata
A yau shafin na mu zai koya mana yadda ake Wainar Masara da Miyar Yaji:
Wainar masara na daga cikin abincin gargajiya da Hausawa ke matukar so. Ana iya ci da safe ko yamma tare da miya mai dandano.
Yadda ake hadawa:
Kayan hadin Wainar Masara:
Masara (ko garin masara), Albasa, Yis, Gishiri kadan, Ruwa, Man gyada.
Yadda Ake hadawa:
Da farko a jika masara na tsawon sa’o’i shida zuwa takwas. Bayan ta yi laushi, a wanke ta sannan a kai nika tare da albasa.
A zuba gishiri kadan a cikin nikakken kullin tare da yis karamin cokali, sannan a gauraya sosai. Sannan a rufe a ajiye a wuri mai dumin abarshi na tsawon Awa daya.
A dora kaskon waina a wuta, a shafa masa mai kadan. Sai a dinga zuba kullin a hankali cikin ramukan kaskon, a rufe har ya soyu.
Bayan ya yi launin zinariya, a juya dayan gefen domin ya gama gasuwa. Daga nan sai a sauke.
Kayan Hadin Miyar Yaji:
Tattasai, Attarugu, Albasa, Kayan kamshi ( Kori, Tayim da sauransu), Magi, Gishiri, Man gyada, Nama ko kifi (idan ana so)
Yadda ake hada Miyar Yaji:
A markada tattasai, attarugu da albasa tare.
A dora tukunya a wuta, a zuba mai kadan sannan a soya albasa. Bayan haka a zuba markadadden kayan miya.
A bar su su dahu sosai sannan a saka kayan kamshi, gishiri da magi.
Idan ana amfani da nama ko kifi, a saka a wannan lokaci. A ci gaba da dafawa har sai miya ta yi kauri kuma ta hadu da kyau.
Yadda Ake ci:
A jera wainar masara a faranti sannan a zuba miyar yaji a gefe ko a sama gwargwadon yadda ake so.
Wannan abinci yana da dandano sosai, kuma ya dace a ci shi da shayi ko abin sha mai sanyi.
Allah Ya sa a gwada lafiya.
