‘Yan sama jannatin kumbon Shenzhou-21 da ke tashar sararin samaniya ta Tiangong ta kasar Sin sun kammala jerin atisayen samun horo mai mahimmanci da gwaje-gwajen kimiyya masu zurfi a cikin sararin samaniya, inda suka kafa harsashi mai karfi na ayyukan da za a gudanar nan gaba da kuma binciken kimiyya.
Wani rahoto na bidiyo da rukunin gidajen rediyo da talabijin na kasar Sin (CMG) ya nuna a jiya Lahadi da dare, ya nuna ‘yan sama jannatin suna gudanar da cikakken atisayen gwaji, ciki har da na aiki da na’ura daga nesa a kayyadadden lokaci, da sada ayyukan kumbuna biyu, da hanyoyin gudanar da ayyukan ceto na kiwon lafiya da kuma samun horon kwashe mutane cikin gaggawa, duk a makon da ya gabata.
Kamar yadda aka bayyana a rahoton, an tsara wadannan ayyukan ne don inganta kwarewar aikin ‘yan sama jannatin da kuma kai daukin gaggawa a yayin da suke zama na dogon lokaci a cikin kumbon,
A cewar rahoton, domin samun horon iya aiki da na’ura daga nesa a lokacin sada ayyukan kumbuna biyu, ‘yan sama jannatin sun yi amfani da hannu wajen sarrafa na’urori don kwaikwayon yadda ake tafiyar da tsarin jagorancin kumbuna a sama. Atisayen bangaren kiwon lafiya kuwa, ya fi mayar da hankali ne kan fahimtar da ‘yan sama jannatin game da wuri da yadda ake aiki da kayan kiwon lafiyar, tare da yin bita kan ka’idoji domin tabbatar da an kimtsa tsaf wajen shawo kan matsalolin kiwon lafiya idan sun taso. (Mai fassara: Abdulrazaq Yahuza Jere)
