Rundunar ’Yansandan Nijeriya ta ce ta kwato motoci 52 da aka sace, tare da kama masu laifi 177 a faɗin ƙasar cikin makon da ya ƙare ranar 18 ga Satumba 2026.
Rundunar ta kuma ce jami’anta sun ceto mutane 25 da aka yi garkuwa da su, tare da kwato bindigogi iri-iri guda 38 da kuma harsasai 2,578.
Haka kuma, rundunar ta ce an kashe wasu ’yan bindiga 11 da ta bayyana a matsayin manyan masu laifi dake ɗauke da manyan makamai yayin samamen da aka gudanar a faɗin ƙasar.
Jami’in hulɗa da jama’a na rundunar, CSP Ani Iniedu, ne ya bayyana alkaluman yayin wani taron duba ayyukan rundunar na mako-mako.
A Jihar Kaduna, rundunar ta ce ta tarwatsa sansanonin masu garkuwa da mutane, inda aka kashe mutane huɗu da ake zargi ’yan bindiga ne, aka kama wasu 12, tare da ceto mutane biyu da aka yi garkuwa da su.
Rundunar ta ce ayyukan sun kasance wani ɓangare na ci gaba da ƙoƙarin dakile aikata laifuka da kuma inganta tsaron al’umma a sassan Nijeriya.
