Mai Alfarma Sarkin Musulmi, Alhaji Muhammadu Sa’ad Abubakar III, ya yi kira ga shugabannin addinai da su guji kare masu aikata laifuka, musamman masu cin hanci da rashawa, saboda dangantakar addini, zumunci ko abota.
Sarkin ya ce bai kamata limamai, fastoci ko shugabannin addini su kare duk wanda ya aikata laifi saboda kasancewarsa ɗan’uwa, aboki ko makusanci.
Ya bayyana hakan ne a taron Majalisar Ƙoli ta Addinai ta Nijeriya (NIREC) da aka gudanar a Abuja ranar Laraba, inda ya jaddada cewa masu aikata laifi ya kamata su fuskanci hukunci ba tare da nuna wariya ba.
Sarkin ya kuma bukaci shugabannin addinai su goyi bayan yaƙi da cin hanci da rashawa, tare da barin hukumomin tsaro da na shari’a su gudanar da ayyukansu ba tare da katsalandan ba.
Ya ce: “Duk wanda yake da hannu, ko ’yan’uwanmu ne, ’yan’uwarmu mata, iyayenmu ko abokanmu, dole ne su fuskanci doka.”
