Yau ce ranar kandagarkin guguwar rairayi ta duniya, kuma taken ranar a bana shi ne “kare halittu da gonaki daga barnar guguwar rairayi”. A wannan rana ta musamman da aka kebe, kafar CMG ta ruwaito hukuma mai kula da dazuzuka da filayen ciyayi ta kasar Sin na cewa, yanayin guguwar rairayi da a kan samu a kasar Sin a lokacin bazara, ya yi ta raguwa a cikin shekaru 20 da suka gabata.
Alkaluman da hukumar ta fitar sun nuna cewa, an samu yanayin guguwar rairayi a kwanaki 8 a lokacin bazarar bana. Kana idan an tantance matsakaiciyar jimillar yawan abkuwar guguwar rairayi, to, za a ga ya ragu daga 12.5 duk shekara a baya, zuwa 9.6 a shekarun baya bayan nan.
A ‘yan shekarun nan, kasar Sin ta aiwatar da wani cikakken tsarin kula da yankuna masu tsaunuka da ruwa, da dazuzuka, da gonaki, da tabkuna, da filayen ciyayi, da kuma yankunan hamada.
Zuwa yanzu, an dasa itatuwa don kafa dazuzuka da fadinsu ya kai eka miliyan 480, da daidaita yanayin filayen ciyayi da fadinsu ya kai eka biliyan 1 da miliyan 280 a wasu yankunan arewacin kasar Sin.
Kana a yankunan da ake gudanar da mafi yawan ayyukan daidaita muhalli, kwararar hamada ta riga ta zama tarihi, inda ake ganin habakar dazuzuka da filayen ciyayi maimakon ta yankunan hamada. (Bello Wang)
