Wata Babbar Kotu a Jihar Kano ta ba ƴansanda umarnin gudanar da cikakken bincike a kan ɗan majalisar wakilai mai wakiltar mazaɓar Gwarzo/Kabo, Hon. Muazu Abdullahi-Gwarzo (wanda aka fi sani da Baban Gandu), bisa zargin haɗin baki wajen aikata laifi, da barazana ga rayuwa, cin zarafi, da kuma rushe gini ba bisa ƙa’ida ba.
Wannan umarni ya fito ne ta cikin wata wasiƙa mai kwanan watan 19 ga watan Oktoba, 2026, daga magatakardan kotun zuwa ga Mataimakin Sufeto Janar na Ƴansanda (AIG) mai kula da sashin binciken sirri na shiyya, biyo bayan umarnin Babban Kotun Majistare Mai Lamba 5 da ke Gyadi-Gyadi a birnin Kano.
Taƙaddamar ta samo asali ne daga ƙorafin da wani mazaunin unguwar Danbare a Ƙaramar Hukumar Kumbotso mai suna Sulaiman Isah ya shigar ta hannun lauyoyinsa na kamfanin A.S. Tunkuyau & Associates, kan wani fili da kangon da ya saya wanda a baya ya kasance mallakin ɗan majalisar ta hanyar wasu dillalai. Isah ya yi zargin cewa bayan ya kammala biyan kuɗi tare da karɓar dukkan takardun mallaka, ɗan majalisar ya nuna rashin jin daɗinsa tare da ƙaryata cewa ya sayar da filin, lamarin da ya haifar da sa-in-sa tsakaninsu.
A cewar takardar ƙorafin, lamarin ya auku ne da misalin ƙarfe 11:00 na daren ranar 16 ga watan Oktoba, 2026, inda Isah ya dawo gida ya tarar da wasu mutane a gaban ɗan majalisar suna rushe gininsa. Da ya nuna musu takardun mallakar filin tare da ciro wayarsa domin ɗaukar bidiyon yadda ake rushe ginin a matsayin shaida, an zargi ɗan majalisar da bayar da umarni cewa: “Ku ƙwace wayar, ku daka min shi,” inda wasu mutane huɗu suka auka masa da duka tare da ji masa raunuka a sassan jikinsa har sai da maƙwabta suka kawo masa ɗauki.
Lauyoyin mai ƙara sun buƙaci rundunar ƴansanda da ta gudanar da sahihin bincike ba tare da nuna son kai ba, suna masu jaddada cewa matsayin Gwarzo na ɗan majalisar tarayya mai ci ba zai ba shi kariya daga fuskantar doka ba idan har an same shi da laifi.
Jaridar Daily Nigeria ta yi ƙoƙarin jin ta bakin ɗan majalisar amma hakan bai samu nasara ba sakamakon rashin ɗaga kiran waya ko amsa saƙonnin tes da aka tura masa, yayin da lauyoyin suka buƙaci a ba mai ƙara da shaidunsa kariya daga duk wata barazana.
