2023: Mai Binciken Kudin PDP Da Wasu Jiga-jigan Jam’iyyar Sun Koma NNPP A Gombe

Yayin da saura makonni takwas a yi zaɓen shugaban ƙasa da na ‘yan majalisar tarayya, kuma saura makonni goma a yi zaɓen gwamnoni, NNPP na ci gaba da samun tagomashi a Jihar Gombe.

Farkon wannan makon ne Babban Mai Binciken Kuɗin PDP na Jihar Gombe, Honorabul Mahmoud Mohammed Wafa ya fice daga jam’iyyar, ya koma NNPP.

• Gwamna Gombe Ya Taya Kiristoci Murnar Kirsimeti, Ya Hore Su Kan Zaman Lafiya

Wafa ya bayyana ficewar ta sa ce a lokacin da ya kai wa ɗan takarar gwamnan Gombe na NNPP, Khamisu Mailantarki ziyara a gidan sa da ke Abuja.

Ya ce ya shiga NNPP ne domin a haɗa hannu dashi a ceto Jihar Gombe daga hannun gwamnatin APC, wadda ya ce ya ƙasƙantar da jihar Gombe a idon faɗin ƙasar nan baki ɗaya.

“Na shigo NNPP ne bisa la’akari da na yi cewa akwai buƙatar a haɗa hannu a ceto Jihar Gombe daga hannun APC. Sannan kuma ita PDP tun bayan zaɓen fidda gwani a shekarar da ta gabata ta samu gagarimar matsala. Saboda haka APC da PDP ɗin duk ba za su iya samar mana shugabanci na gari a Gombe ba.”

“Amma idan mu ka waiwaya baya dangane da tasirin da Mailantarki ya yi a baya, to shi ne zai samar da nagartaccen shugabancin da zai bunƙasa Gombe bayan zaɓen 2023.”

Tun da zaɓen 2023 ya gabato ne mambobi da wasu jiga-jigan APC da PDP ke da tururuwar ficewa su na komawa NNPP.

Ko a farkon wannan makon sai da wasu shugabannin PDP daga ƙananan hukimomin Funakaye da Dukku, su ka fice daga PDP su ka koma NNPP.

Sulaiman

+ postsBio

• Sulaiman

  Dokar Sin Ta Gurfanar Da Masu Rajin Ballewar Kabilun Kasar Da Ke Kasashen Waje Ta Dace
• Sulaiman

  ’Yan Kasuwa Na Kasashen Waje Sun Yaba Wa Yanayin Kasuwanci Na Sin
• Sulaiman

  Yadda Uba Sani Ya Farfaɗo Da Asibitin Da Aka Yi Watsi Da Shi Tsawon Shekaru 40 – Hakimin Makarfi
• Sulaiman

  Dandalin DAVOS Na Bana: Fage Ne Da “Kirkire-Kirkiren Sin” Ya Sadu Da “Kyakkyawan Fatan Afirka”