Olujonwo Obasanjo, ɗa ga tsohon Shugaban Ƙasa Olusegun Obasanjo, ya sanar da shiga ƙungiyar ‘Tinubu Must Stay Movement’, wadda ke fafutukar ganin Shugaba Bola Ahmed Tinubu ya ci gaba da mulki bayan shekarar 2027. Olujonwo ya bayyana matakinsa ne a yayin wani taron manema labarai da aka gudanar a birnin Abuja a ranar Alhamis, 22 ga watan Oktoba, 2026, inda shugabancin ƙungiyar ta Tinubu Movement for Sustainable Governance Foundation (TMS) ya karɓe shi hannu biyu-biyu.
Da yake jawabi a wurin taron, Olujonwo ya bayyana cewa shawarar tasa ta samo asali ne daga ƙwarewarsa a fagen siyasa, sanin tarihin sauye-sauyen tsare-tsare a Nijeriya, da kuma imanin da yake da shi kan cewa ci gaba da aiwatar da kyawawan manufofin gwamnati ba tare da katsewa ba shi ne zai kawo ci gaban ƙasa. Ya jaddada cewa ba baƙo ba ne a jam’iyya mai mulki, domin yana cikin APC tun kafuwarta a shekarar 2014 a lokacin da mahaifinsa ya karɓi baƙuncin marigayi tsohon Shugaban Ƙasa Muhammadu Buhari da Shugaba Bola Tinubu.
Olujonwo ya koka da yadda rashin isar da bayanai masu inganci ke bai wa masu adawa damar yaɗa labaran ƙarya da gurɓata kyakkyawan aikin da gwamnatin Tinubu ke yi. Ya nuna cewa a ƙarƙashin wannan gwamnati, an kawo ƙarshen yajin aikin ƙungiyar malaman jami’o’i (ASUU), an kaddamar da shirin bayar da rancen karatu ga ɗalibai (Student Loan), kuma ana ta gine-gine aiyukan more rauwa da jan hankalin masu zuba jari. Ya ce aikin TMS shi ne fito da waɗannan manufofi a fili da kuma bayyana fa’idarsu ga talakawan ƙasar maimakon dogaro da taken siyasa kawai.
A nasa jawabin, Babban Kodinetan Ƙungiyar ta TMS kuma Darakta Janar na Hukumar NITDA, Kashifu Inuwa Abdullahi, ya bayyana jin daɗinsa kan shigowar Olujonwo, yana mai cewa ya fito ne daga dangin da suka kafa tubalin sauye-sauyen tattalin arziƙi na zamani a Nijeriya, musamman a fannin sadarwa da tsarin bankuna. Kashifu Abdullahi ya yi gargaɗin cewa yawan sauya tsare-tsare na lalata kwarin gwiwar masu zuba jari, yana mai nuni da cewa tsare-tsaren Tinubu na ƙara ƙarfafa darajar Naira, da kasuwar hannayen jari, da kuma matatar mai ta Dangote.
Shi ma a nasa ɓangaren, Darakta Janar na TMS, Marcel Ngogbehei wanda tsohon jigo ne a tafiyar Obidient ya bayyana shigowar Olujonwo a matsayin wani gagarumin ci gaba ga tafiyar. Ya jaddada cewa an kafa ƙungiyar ne domin zaburar da al’umma su fahimci ainihin manufofin gwamnati, da daƙile kuskuren fahimta, da kuma tabbatar da cewa tsare-tsaren Shugaba Tinubu sun ɗore bayan babban zaɓen 2027.
