Mataimakin Kwanturolan Janar na Hukumar Shige da Fice ta Ƙasa (NIS), James Sunday, ya yi bikin cikarsa shekaru 35 yana yi wa Nijeriya hidima.
An yi amfani da gasar 2024 National Guards Polo da aka gudanar a Abuja domin taya shi murna.
- Yawan Kai-Komon Mutane Tsakanin Lardunan Sin Zai Kai Kimanin Biliyan 64.5 A 2024
- Saka Zai Yi Jinyar Makonni Bayan Raunin Da Ya Samu
A matsayin ƙwararren ɗan wasa na Polo kuma tsohon shugaban ƙungiyar wasan Polo ta Hukumar Shige da Fice (2017–2019), ACG Sunday, ya yi amfani da wannan dama wajen tunawa da nasarorinsa a aikin kafin ya yi ritaya.
ACG Sunday, wanda ya shiga aikin Hukumar NIS a ranar 22 ga watan Disamba, 1989, zai yi ritaya a ranar 22 ga Disamban 2024.
A lokacin da ya shfe a aikinsa, ya yi ayyuka daban-daban, ciki har da zama jami’in hulɗa da jama’a na hukumar, Kwanturolan Filin Jirgin Sama na Nnamdi Azikiwe, da kuma Kwamandan Shiyyar C da ke kula da jihohin Arewa maso Gabas shida.
Har ila yau, ya karɓi lambobin yabo daban-daban, ciki har da na INTERPOL da wasu daga ƙasashe daban-daban.
A ɓangaren ilimi, yana da digiri na biyu a Harkokin Diflomasiyya daga Jami’ar Ahmadu Bello da ke Zariya, ACG Sunday ya kasance ƙwararren wajen warware rikice-rikice, sannan shi ne jami’in farko mai kula da hukumar INTERPOL a NIS.
Yana da aure da yara, kuma zai yi ritaya a matsayin ƙwararren ma’aikaci wanda ya bar gagarumin gudunmawa a tarihin hukumar.
Ga hotunan yadda bikin ya kasance:
