Shugaban Hukumar Ƙwallon Ƙafa ta Jihar Kano (KSFA), Alhaji Sharif Rabiu Ahlan, ya bayyana cewa rashin masu zuba hannun jari a harkar ƙwallon ƙafa shi ne babban ƙalubalen da hukumar ke fuskanta, duk da yawan ƙungiyoyin ƙwallon ƙafa da kuma matasa masu hazaƙa da jihar ke da su.
Ahlan ya ce hukumar na ƙoƙarin tabbatar da ci gaba da gudanar da gasar ƙalubale a ƙananan hukumomi 44 na jihar. Sai dai ya jaddada cewa ana buƙatar ƙarin kuɗaɗe domin inganta ayyukan hukumar da kuma mayar da Kano cibiyar da za ta riƙa samar da ƙwararrun ƴan wasa ga manyan ƙungiyoyin ƙwallon ƙafa na duniya.
Da yake magana da manema labarai a Kano, Ahlan ya bayyana cewa jihar na daga cikin wuraren da ƙwallon ƙafa ta fi samun karɓuwa a Nijeriya, lamarin da ya taimaka wajen samun ƙungiyoyin ƙwallon ƙafa masu rajista fiye da 500 a faɗin jihar. Ya ce hukumar da yake jagoranta ta mayar da hankali ne wajen gano matasa masu hazaka da taimaka musu su samu damar taka leda a matakin ƙasa da ƙasa.
Ya ƙara da cewa, duk da ɗimbin ƙungiyoyin da ake da su, rashin tallafin kuɗi daga masu zuba hannun jari na kawo cikas ga ƙoƙarin bunƙasa harkar ƙwallon ƙafa a jihar. A cewarsa, samun isasshen jari zai taimaka wajen inganta gasanni, horar da ƴan wasa da samar da yanayin da zai ba su damar nuna ƙwarewarsu.
Ahlan ya yi kira ga masu hannu da shuni a cikin Kano da wajen jihar da su zuba jari a harkar ƙwallon ƙafa. Ya ce hakan zai taimaka wajen farfaɗo da harkar, da gano ƙwararrun ƴan wasa da kuma ba su damar nuna bajintarsu a manyan gasanni na duniya.
