An kwashe mara lafiyar da aka tabbatar tana ɗauke da cutar Ebola daga Nijeriya zuwa ƙasar Switzerland domin ci gaba da kula da lafiyarta. Ministan Lafiya da Jin Daɗin Jama’a na Nijeriya, Muhammad Ali Pate, ne ya tabbatar da hakan a ranar Litinin, 26 ga Oktoba, 2026.
Matar mai shekaru 42, wadda aka tabbatar tana ɗauke da nau’in cutar Ebola mai suna Bundibugyo, ta tashi daga Abuja da jirgin ɗaukar marasa lafiya na musamman. Pate ya ce lafiyarta ta inganta sosai, tana cikin hayyacinta, tana iya magana, kuma sakamakon gwaje-gwajen lafiyarta na komawa kusa da yadda ya kamata (warkewa).
An kuma haɗa da mijinta zuwa Switzerland. Ministan ya bayyana cewa mijin nata, wanda ɗan diflomasiyyar Switzerland ne da ke aiki a Abuja, bai nuna alamun kamuwa da cutar ba. Sai dai ya jaddada cewa ingantuwar lafiyar matar ba na nufin ta daina yaɗa cutar ba, saboda haka aka bi ƙa’idojin kariya masu tsauri kafin a kwashe su.
Bayan tabbatar da kamuwa da cutar a ranar 20 ga Oktoba, Cibiyar Yaƙi da Cututtuka Masu Yaɗuwa ta Nijeriya (NCDC) ta ce an gano mutane 53 da suka yi hulɗa da mara lafiyar, ciki har da ma’aikatan lafiya, da ma’aikatan gida da mijinta. An sanya su cikin tsarin sa ido domin gano duk wata alamar kamuwa da cutar.
Matar ta dawo Nijeriya daga Uganda ta hanyar Addis Ababa a ranar 3 ga Oktoba, sannan ta fara nuna alamun rashin lafiya bayan kwana huɗu. Hukumomin lafiya na ci gaba da bincike domin gano yadda ta kamu da cutar.
Ministan ya buƙaci ƴan Nijeriya su kasance cikin shiri, su bi bayanan da hukumomin lafiya masu sahihanci ke fitarwa, tare da haɗin kai da jami’an kiwon lafiya.
