Ruwan sama da aka kwashe kimanin sa’o’i tara ana yi ya haddasa ambaliyar ruwa a Makurdi, babban birnin Jihar Benue, inda ruwa ya shiga gidaje tare da jefa jama’a cikin mawuyacin hali.
Ruwan saman ya fara sauka ne tun da safitar ranar Litinin kuma ya ci gaba da sauka har zuwa yammacin ranar.
Yankunan da abin ya shafa sun haɗa da Achusa, Wadata, Wurukum, Logo, Ankpa Quarters da North Bank.
Wani mazaunin Logo, Iorwuese Terlumun, ya ce ya farka da tsakar dare ya ga ruwa ya shanye gidansa.
Ya ce katifarsa kawai ya samu damar fita da ita, yayin da littattafansa da takardunsa suka lalace.
Wani mazaunin Wurukum, Sylvester Orya, ya ce ruwa ya shiga harabar gidansa, ya jiƙa masa kayayyaki da sauran kayan amfaninsa.
Kakakin Hukumar Bayar da Agajin Gaggawa ta Jihar Benue (SEMA), Tema Ager, ta tabbatar da aukuwar ambaliyar.
Ta ce ruwa ya shiga gidaje da dama, yayin da wasu gidaje a Achusa suka nutse gaba ɗaya.
Ager ta kuma ce akwai rahoto da ya ce wani yaro mai shekaru 10 ya mutu a dalilin ambaliyar.
Sai dai ta ce hukumar ba ta tabbatar da sahihancin rahoton ba.
SEMA ta ce za ta gudanar da bincike a yankunan da abin ya shafa domin tantance girman ɓarnar da ambaliyar ta yi.
