An bude bikin baje kolin hada-hadar samar da kayayyaki na kasa da kasa na kasar Sin ko CISCE karo na hudu a yau Litinin a birnin Beijing. Bikin na bana ya kunshi sassa 6 da suka hada da fasahar dijital, da hikima, da masana’antu na zamani, da aikin gona maras gurbatta muhalli, da kuma rayuwa mai inganci, da motoci masu aiki da fasahar AI, da makamashi mai tsabta, da kuma bangaren ba da hidima na hada-hadar samar da kayayyaki .
Bikin na bana ya jawo kamfanoni 676 daga kasashe, yankuna da kungiyoyin kasa da kasa 85. Yawan manyan kamfanoni wadanda suke cikin jerin kamfanoni masu karfi a duniya guda 500, da masana’antu dake sahun gaba da suka halarci bikin ya kai kashi 65% .
Idan aka hada da abokan hadin gwiwar masu baje kolin a sassan samar da kayayyaki, adadin masu baje kolin na iya zarce 1,200.Fasahar AI tana daya daga cikin manyan abubuwan da ake mayar da hankali kan ta a yayin bikin na bana.
A karon farko, an kafa wani yanki na musamman kan AI a sashen fasahar dijital da hikima, wanda ya tattaro manyan kamfanonin AI na cikin gida da na kasashen waje .
Ana sa ran za a gabatar da sabbin kayayyaki da fasahohi fiye da 160 a karon farko a yayin wannan biki. A yayin bikin, za a kuma gudanar da ayyukan kara wa juna sani har sau 70 game da musayar masana’antu da kasuwanci. (Amina Xu)
