An bude taron kasa da kasa kan hakkin mallaka na shekarar 2026, jiya Litinin a Dunhuang na lardin Gansu, wanda hukumar kula da hakkin mallaka ta kasar Sin da kungiyar kare hakkin mallaka ta duniya suka gudanar da shi tare.
Taron mai taken “Hakkin mallaka da masana’antun kirkire-kirkire a zamanin fasahar zamani da kirkirarriyar Basira wato AI: Kare kayan tarihi na al’adu da ingiza kirkire-kirkire”, na da nufin ingiza ci gaban masana’antun kirkire-kirkire cikin inganci da kara azamar kiyaye kayan tarihi na al’adu da yin amfani da su yadda ya kamata, bisa bukatun bunkasar zamanin fasahar zamani da fasahar AI, ta amfani da hakkin mallaka a matsayin mahadar dake hada gargajiya da makomar gobe. Hakan zai samar da hikima da karfi wajen samar da wadata ga al’adun duniya.
An ba da labari cewa, a yayin taron, hukumar kula da hakkin mallaka ta kasar Sin da kungiyar kare hakkin mallaka ta duniya sun sanya hannu kan takardar neman kulla hadin gwiwa, inda za su yi hadin gwiwa kan gudanar da aikin gwaji na “hakkin mallaka da al’adun jama’a da yawon bude ido” a birnin Chongqing da kuma birnin Jincheng na lardin Shanxi na kasar Sin.(Amina Xu)
