Majalisar Dokokin Tarayya na shirin miƙa kudirin dokar kafa rundunar ’yansandan jihohi ga Shugaban Ƙasa, Bola Ahmed Tinubu, domin ya sanya wa dokar hannu, bayan kammala tantance sahihancin amincewar da majalisun dokokin jihohi 28 suka bayar.
Magatakardar Majalisar Dokokin Tarayya, Kamoru Ogunlana, ne ya bayyana hakan a cikin wata sanarwa da ya fitar a ranar Talata, inda ya tabbatar da cewa adadin majalisun dokokin jihohin da suka amince da kudirin gyaran kundin tsarin mulki ya haura adadin jihohi 24 da kundin tsarin mulki ya tanada.
Ya ce ofishinsa ya gudanar da aikin tantance rahotanni da takardun sakamakon zaman majalisun jihohin domin tabbatar da sahihancinsu, da kuma tabbatar da cewa bayanan sun yi daidai da matakan da kowace majalisa ta ɗauka.
A cewarsa, ganin cewa adadin jihohin da suka amince da kudirin ya kai matakin da ake buƙata, ana ƙoƙarin ganin an kammala sauran matakan gudanarwa domin miƙa kudirin ga Shugaban Ƙasa, bisa tanadin dokar tabbatar da sahihancin dokoki ta shekarar 2004.
Kudirin dokar na neman yin gyara ga Kundin Tsarin Mulkin Nijeriya na 1999 domin samar da rundunonin ’yansandan jihohi da sauran abubuwan da suka shafi hakan.
Matakin na zuwa ne a daidai lokacin da ake ƙara samun kiraye-kirayen samar da tsarin aikin ’yansanda mai zaman kansa a jihohi, domin tunkarar matsalolin tsaro da ke addabar Nijeriya.
