Jam’iyyar APC a Jihar Kano ta musanta zargin Sanata Rabiu Musa Kwankwaso cewa ita da Gwamna Abba Yusuf ne suka yi sanadin cire sunan ɗan takarar gwamna na jam’iyyar NDC, Aminu Abdussalam Gwarzo, daga jerin sunayen INEC.
Shugaban APC na jihar, Alhaji Umar Haruna-Doguwa, ne ya bayyana hakan cikin wata sanarwa da ya fitar ranar Talata, inda ya bayyana zargin a matsayin marar tushe da nufin ɓata sunan jam’iyyar da ɗan takararta na gwamna.
Ya ce shari’ar da ta shafi Abdussalam-Gwarzo ta samo asali ne daga rikicin cikin gida na jam’iyyar NDC, ba tare da APC ko Gwamnatin Jihar Kano sun taka rawa a cikinta ba.
Haruna-Doguwa ya jaddada cewa APC ba ta shigar da ƙara ba, kuma ba ta yi tasiri ko katsalandan a matakan shari’ar da ke kan ɗan takarar ba.
Ya kuma kalubalanci Kwankwaso da ya gabatar da sahihiyar hujja da ke nuna alaƙar APC ko Gwamna Abba Yusuf da shari’ar, maimakon yin zarge-zargen da ka iya haifar da rikicin siyasa.
Shugaban APCn ya ce jam’iyyarsa na mutunta ‘yancin kowane ɗan takara na shiga zaɓen 2027 bisa tanadin doka, yana mai cewa bai kamata a danganta ta da rikicin cikin gida na wata jam’iyya ba.
