Bayan shafe shekaru ana fama da matsalolin sufuri da wahalhalun zirga-zirga a babbar hanyar Abuja zuwa Kaduna, ci gaban da ake samu a aikin sake gina hanyar ya fara farfaɗo da fatan direbobi da sauran masu amfani da ita.Hanyar Abuja-Kaduna na daga cikin muhimman hanyoyin sufuri a Nijeriya, kasancewar tana haɗa Babban Birnin Tarayya da Jihar Kaduna da sauran sassan Arewacin ƙasar, tare da sauƙaƙa jigilar mutane da kayayyaki da harkokin kasuwanci.
Tsawon shekaru, masu amfani da hanyar sun sha fama da lalacewar wasu sassan hanya, cunkoson ababen hawa da kuma ɗaukar lokaci mai tsawo wajen kammala tafiya, lamarin da ya ƙara wa matafiya wahalhalu.Sai dai ci gaban da ake samu a aikin gyaran hanyar a ‘yan watannin nan ya fara kawo sauyi, inda wasu direbobi ke bayyana gamsuwarsu da yadda aikin ke tafiya.
Da yake zantawa da wakilinmu, Malam Bello Mu’azu, wani direban haya da ke zirga-zirga daga Zariya zuwa Abuja kusan kullum, ya ce yadda ake samun ci gaba a aikin ya ba shi ƙwarin gwiwar cewa za a kammala hanyar kamar yadda aka tsara.
Ya bayyana cewa tafiya tsakanin Kaduna da Abuja ta fara zama cikin sauƙi idan aka kwatanta da halin da ake ciki a baya, yana mai cewa wannan ci gaba ya ƙara masa fatan ganin an kammala aikin ba tare da ƙarin jinkiri ba.
A cewarsa, ci gaba da gudanar da aikin zai taimaka wajen inganta zirga-zirga tare da rage wahalhalun da direbobi da fasinjoji ke fuskanta.Sai dai Mu’azu ya yi gargaɗin cewa bai kamata direbobi su ɗauki sauƙin da aka samu a wasu sassan hanyar a matsayin damar yin tuƙi da gudu fiye da ƙima ba.
Ya buƙaci masu ababen hawa da su kasance masu taka-tsantsan, bin dokokin hanya da kuma guje wa wuce gona da iri wajen gudu domin kare rayuka da dukiyoyi.
Haka kuma, ya yi kira ga kamfanin da ke gudanar da aikin da ya ƙara himma wajen hanzarta kammala sauran ayyukan, bisa la’akari da muhimmancin hanyar ga ci gaban tattalin arzikin Najeriya.
Ya ce hanyar na da matuƙar muhimmanci wajen haɗa al’ummomi da sauƙaƙa zirga-zirgar jama’a, tare da bunƙasa harkokin kasuwanci da jigilar kayayyaki tsakanin yankuna daban-daban na ƙasar.
A nasa ɓangaren, kamfanin Infoquest, wanda ke gudanar da aikin, ya tabbatar wa ‘yan Najeriya cewa yana da cikakken ƙudurin kammala aikin bisa wa’adin da aka amince da shi.
Wannan tabbaci na zuwa ne a daidai lokacin da masu amfani da hanyar ke nuna fatan ganin an kammala aikin cikin lokaci domin samun cikakkiyar mafita ga matsalolin sufuri da suka daɗe suna fuskanta.
Ga direbobi da sauran matafiya, ci gaban da ake samu a aikin ya zama wani sabon fata na samun hanya mai inganci da rage wahalhalun tafiye-tafiye, tare da ƙarfafa harkokin tattalin arziki a wannan muhimmiyar hanyar sufuri ta ƙasa.
