Rundunar ’yansandan jihar Kano ta gano wani jirgi mara matuƙi da ake zargin masu aikata laifuka ne ke amfani da shi.
Kakakin rundunar, CSP Abdullahi Haruna Kiyawa, ya ce an gano jirgin ne yayin da jami’an ’yansanda ke gudanar da samame a yankunan da ke iyakar jihar.
Ya ce jami’an sun gano jirgin a wani daji da ke Tarau, a cikin ƙaramar hukumar Bebeji ta jihar Kano.
A yanzu haka, ƙwararru na binciken jirgin domin gano irin abubuwan da ke cikinsa da kuma abin da ake amfani da shi.
A wani samame kuma, ’yansandan sun kama wani mutum mai shekara 35 da ake zargi da hannu wajen garkuwa da mutane domin neman kuɗin fansa.
Kiyawa ya ce wanda aka kama na zaune a Kunkumi, ƙaramar hukumar Maƙarfi a jihar Kaduna, kuma ana zarginsa da kasancewa cikin wata ƙungiyar masu aikata laifuka da ke da hannu wajen garkuwa, fashi da makami da satar shanu a Kano, Katsina da Kaduna.
Ya ce bincike ya kai ga kama wani mutum da ke zaune a Kwanar Ɗangora a Kano, wanda ake zargi da taimaka wa ƙungiyar wajen shirya yadda za a yi garkuwa da mutane.
A cewar ’yansandan, waɗanda ake zargin sun taɓa yin garkuwa da wata mata, inda suka karɓi Naira miliyan 20 a matsayin kuɗin fansa.
Haka kuma, ana zargin sun sace wani mutum a garin Gwarzo, suka kai shi jihar Kaduna, inda suka riƙe shi har sai da iyalansa suka biya kuɗin fansa.
Kakakin ya ce ana ci gaba da bincike kan lamarin.
Ya tabbatar da cewa za a gurfanar da waɗanda aka kama a gaban kotu bayan kammala bincike.
