Sakataren jam’iyyar APC na ƙasa, Sanata Ajibola Bashiru, ya nuna shakku kan ko tsohon mataimakin shugaban ƙasa, Atiku Abubakar, zai iya farfaɗo da tattalin arziƙin Nijeriya idan aka zaɓe shi shugaban ƙasa a 2027.
Da yake magana a shirin Politics Today na gidan talabijin na Channels a ranar Laraba, Bashiru ya ce kasancewar Atiku tsohon mataimakin shugaban ƙasa ba yana nufin yana da ƙwarewa a fannin tattalin arziƙi ba.
Sakataren ya kuma zargi Atiku da taka rawa wajen haddasa wasu daga cikin matsalolin tattalin arziƙin da gwamnatin Shugaba Bola Tinubu ke ƙoƙarin magancewa.
Ya yi hasashen cewa ’yan Nijeriya za su ƙi zaɓen Atiku a zaɓen shugaban ƙasa na 2027.
Bashiru ya kuma soki ’yan siyasar adawa da ke alƙawarin rage farashin man fetur zuwa Naira 200 ko 300 kan kowace lita, yana mai cewa irin waɗannan alƙawura ba su da tushe kuma ana yin su ne domin samun ƙuri’un jama’a.
