Mai taimaka wa babban sakataren MDD Guy Ryder wanda ya zo kasar Sin don halartar dandalin tattauna batun jagorancin duniya na Xiongan na shekarar 2026, ya bayyana wa ‘yan jarida a jiya 24 ga wannan wata, a sabon yankin Xiongan dake lardin Hebei na kasar Sin cewa, kasar Sin ta taka muhimmiyar rawa wajen daidaita tafiyar da harkokin duniya, kuma shawarwari hudu da kasar Sin ta gabatar sun dace da burin MDD. A cewarsa, hangen nesa da kasar Sin ta yi ya burge sassan duniya, kuma wannan ne kasa da kasa suke bukata a halin yanzu.  Ryder ya bayyana cewa, MDD tana ci gaba da daukar kasar Sin a matsayin muhimmiyar abokiyar hadin gwiwa. Ya ce, shawarwari na duniya guda hudu da kasar Sin ta gabatar suna shafar fannonin samun ci gaba, da kiyaye tsaro, da raya al’adu, da daidaita harkokin kasa da kasa da sauransu, wadanda suka dace da burin tsarin bangarori daban daban ciki har da burin MDD. A lokuta da dama, kasar Sin ta nuna goyon baya ga ra’ayin bangarori daban daban da kuma MDD, ta ce za ta tabbatar da kiyaye tsarin duniya a karkashin tushen MDD, da kuma odar kasa da kasa bisa tushen dokokin kasa da kasa.   Ryder ya kara da cewa, hadin gwiwar dake tsakanin Sin da sauran kasashe masu tasowa na duniya ya kasance alamarta yayin da take daidaita tafiyar da harkokin duniya. Ya ce, a shekaru 81 da suka gabata, MDD na da membobi guda 51 ne kawai yayin da aka kafa ta, amma ya zuwa yanzu, yawansu ya karu zuwa 193, inda hakan ya nuna cewa, kasashe masu tasowa na duniya sun riga sun shiga harkokin duniya a dukkan fannoni. Amma kuma tsarin jagorancin harkokin duniya na yanzu bai mika cikakken ikon yin magana ga kasashe masu tasowa ba. (Zainab Zhang) 

A yau Lahadi, kasar Sin ta harba rokar dakon kaya kirar Long March-8A daga tsibirin lardin Hainan na kudancin kasar,...

Daraktan Hukumar Lafiya ta Duniya (WHO) na yankin Yammacin Pacific, Saia Ma'u Piukala ya bayyana cewa, kasar Sin tana taka muhimmiyar rawa wajen habaka ci gaban magungunan gargajiya a duniya, ta hanyar amfani da gogewarta wajen hade magungunan gargajiya da tsarin kiwon lafiya na gaba daya.   A wata hira da kamfanin dillancin labarai na Xinhua dangane da babban taron duniya kan magungunan gargajiya na shekarar 2026, Piukala ya bayyana cewa, idan aka hade magungunan gargajiya da tsarin kiwon lafiya yadda ya kamata, magungunan gargajiyar za su iya inganta kyakkyawan sakamakon kiwon lafiya ta hanyar fadada damar samun ayyukan kiwon lafiya, musamman a matakin farko na kula da lafiya.  An gudanar da babban taron duniya kan magungunan gargajiya na shekarar 2026 ne a birnin Beijing, a ranakun 17 da 18 ga watan Oktoba.  A cewar Piukala, kasar Sin ta kafa tsarin magungunan gargajiya mai inganci wanda ya samu tallafi daga kakkarfan tsarin manufofi da kuma ci gaba da zuba jari a fannin ilimi da horaswa, bincike, samar da ayyukan hidimomi da iya tsara dokoki.    Kazalika, ya yi nuni da cewa, kwarewar da kasar Sin ta samu wajen hade magungunan gargajiya da tsarin kiwon lafiya a matakin farko da sauran ayyukan kiwon lafiya, yayin da take amfani da ka'idoji masu alaka da daidaita hadarin da za a fuskanta a bangaren magungunan da likitocin ba da magungunan gargajiyar ta dace kwarai da gaske, musamman da sauran kasashe na yankin Yammacin Pacific.  Haka nan ya ce, kokarin da kasar Sin ke yi na karfafa horas da kwararru, da tabbatar da inganci da kuma binciken kimiyya, shi ma yana ba da darussa masu alfanu domin inganta aminci da ingancin magungunan gargajiyar da kuma taimaka wa mutane yanke shawara mai kyau game da amfani da su. (Abdulrazaq Yahuza Jere)

An gudanar da wani bikin nune-nunen hotuna a ranar Juma'a a Abuja, babban birnin Nijeriya, domin cika shekaru 81 da maido da Taiwan kasar Sin, inda ya samu halartar jami'an diflomasiyya, masana, shugabannin masana'antu, da kwararrun 'yan jarida daga kasar Sin da Nijeriya.  Mai ba da shawara kan harkokin al'adu a ofishin jakadancin kasar Sin da ke Nijeriya, Yang Jianxing, ya bayyana cewa, dawo da Taiwan karkashin ikon kasar Sin wani muhimmin sakamako ne na nasarar da al'ummar kasar Sin suka samu a yakin da suka yi na turjiya ga mamayar kasar Japan, kuma hakan wani bangare ne na daukacin tarihin kasar Sin da ake tunawa da shi.  Yang ya ce, "Wannan bikin nune-nune ya kunshi tarin hotuna na tarihi masu daraja da kuma bayanai dalla-dalla a rubuce, wadanda ke nuna tsayin dakan al'ummar kasar Sin baki daya wajen riko da ka’idar 'kasar Sin daya tak a duniya' da kuma kare ‘yancin kai, hadin kai, da kuma martabar yankunan kasar."  A nasa bangaren, shugaban Cibiyar Nazarin Alakar Sin da Afirka ta Zamani dake Nijeriya, Sheriff Ibrahim, ya bayyana cewa, Nijeriya na ci gaba da amincewa da ka’idar "Sin daya tak a duniya" kuma gwamnatin kasar tana ci gaba da jaddada wannan matsayi.  "Akwai kamanceceniya tsakanin kokarin da kasar Sin ke yi na kiyaye hadin kan kasa, da kuma irin abubuwan da Nijeriya ta karu da su wajen kiyaye martabar yankunanta," kamar yadda Ibrahim ya bayyana, kana ya nuna kwarin gwiwar cewa, daga bisani dai kasar Sin za ta cimma burin sake hadewa da Taiwan cikin lumana. (Abdulrazaq Yahuza Jere) 

A yau Asabar ne aka rufe gasar wasannin nahiyar Asiya ta shekarar nan ta 2026 ajin masu bukata ta musamman,...

Bayan aukuwar girgizar kasa mai karfin maki 7.0 a gundumar Baqen ta birnin Nagqu dake jihar Xizang mai cin gashin kai, ta kudu maso yammacin kasar Sin a ranar Alhamis, an aike da ma’aikatan ceto sama da 5,000.  Girgizar kasar wadda ta auku da misalin karfe 10:33 na dare, ta sabbaba rasuwar mutane 16, tare da jikkatar wasu 76, kana gidaje 339 sun rushe ko sun lalace. A cewar cibiyar bayar da umarnin gaggawa game da girgizar kasa ta gundumar Baqen, ya zuwa karfe uku na yammacin jiya Jumma’a, an kwashe mutane 12,489 lami lafiya. Kazalika, ba a samu rahoton bacewar mutane ba, bayan gudanar da zagaye uku na tantancewa.  Jim kadan bayan aukuwar ibtila’in, reshen yammaci na rundunar ’yantar da al’ummar kasar Sin ko PLA, ya kaddamar da tsarinsa na aikin gaggawa. Kana ya zuwa karfe hudu na yammacin jiyan, sama da dakarun PLA 400, da dakarun rundunar ’yan sanda ta kasar, tare da sama da ababen hawa 50 sun isa wajen domin jinyar wadanda suka jikkata, da kafa tantuna, da sake tsugunar da al’ummun wurin. Har ila yau, an kafa cibiyoyin wucin gadi na kula da lafiya guda biyu, da cibiyoyin rabon abinci masu hidimtawa jama’a.  A daya bangaren kuma, hukumomin tsakiya, da na jiha, da na birane da gundumomi, sun aike da kayan agaji, ciki har da gidajen wucin gadi, da tantuna, da barguna da kayan sanyi. (Saminu Alhassan) 

Kakakin Majalisar Dokokin Kasar Kenya, Moses Wetangula, ya ziyarci kasar Sin a kwanan nan, don halartar dandalin musayar ra’ayi tsakanin ’yan majalisar kasa da kasa, sannan ya yi zantawa ta musamman tare da wakilin babban rukunin gidajen rediyo da talibijin na Sin, wato CMG a takaice. A cewarsa, taron dandalin na da ma’ana da muhimmanci sosai. Ya kara da cewa, kasar Sin abokiyar kut da kut ce ga kasashe masu tasowa na nahiyar Afirka. Ya ce “Kasar Sin ta yau, ba irin yadda take shekaru 30 da suka wuce ba ne, tana da gogewa da za mu iya koyi daga gare ta a fannin ci gaban zamantakewa, da bunkasar tattalin arziki, da zamanantar da masana’antu, da ayyukan injiniya, da kuma sauran fannonin da suka shafi rayuwar jama’a”.  Kasar Sin ta fara aiwatar da manufar soke harajin kaso 100 bisa 100 ga kasashen Afrika dake da huldar diflomasiyya da ita, tun daga watan Mayun shekarar nan ta 2026. Game da hakan, Wetangula ya ce, hakan ya kara wa tattalin arzikin Kenya kuzari sosai, kuma ya sa yawan kayayyakin da kasarsa ke fitarwa zuwa kasar Sin ya yi gagarumar karuwa.  Yayin da duniya ke fuskantar rashin tabbas, Wetangula ya ce, idan muka rike, kuma muka aiwatar da manyan shawarwari guda hudu da kasar Sin ta gabatar(GDI, GSI, GCI da GGI), kowa zai iya zama tare cikin lumana. (Bilkisu Xin) 

Shekarar bana shekara ce ta cika shekaru 90 da cimma nasarar Doguwar Tafiya ta Jar Rundunar Soja ta Ma’aikata da Manoma na Kasar Sin. A ranar Alhamis da ta wuce, an gudanar da babban taron tunawa da hakan a nan birnin Beijing. A yayin taron, sakatare janar na kwamitin koli na jam’iyyar kwaminis ta Sin, kana shugaban kasa, wanda kuma shi ne shugaban kwamitin aikin soja na tsakiya Xi Jinping, ya gabatar da muhimmin jawabi, inda ya jaddada cewa dole ne a tuna da tarihi, domin ta haka ne za a iya gina makoma mai kyau, lamarin da ya ja hankali sosai daga sassa na cikin gida da kuma na kasashen waje.  Dr. Gervas Kasiga, sakataren zartaswa na hukumar kula da fina-finai ta kasar Tanzaniya, ya ce jawabin shugaba Xi ya motsa zuciyarsa sosai. Wato dubban wahalhalu da hadari, ba za su iya karya imanin jajayen sojoji ba. Ruhin Doguwar Tafiya yana haskaka kimar zamani ta musamman, kuma yana fadakarwa ga kasashe masu tasowa wajen neman hanyar ci gaba.  Tarihin Doguwar Tafiya ba ya nesa da mu, kuma hanyar Doguwar Tafiya tana ci gaba da fadada. A matsayinta na kasa ta biyu mafi karfin tattalin arziki a duniya, kuma babbar kasa mai daukar nauyi, kasar Sin tana kokarin samar da sabbin nasarori a sabuwar Doguwar Tafiya da take yi. Wannan ba wai kawai yana amfanar da al’ummar Sin ba ne, har ma yana kara wa duniya da ke cikin rudani da sauye-sauye karfin tabbatar da kwanciyar hankali, kuma yana ba da muhimman darussa ga dan Adam, wajen neman hanyar zamanantar da kasa da samun ci gaba tare.   A ganin Yuri Tavrovsky, mataimakin shugaban kungiyar sada zumunta tsakanin Rasha da Sin, kuma sanannen masani kan tahiri da al’adun Sin a Rasha, nasarorin da kasar Sin ke samu a sabuwar Doguwar Tafiya da take yi, da babban burin farfado da al’ummar Sinawa, ba wai kawai suna da muhimmanci ga al’ummar Sin ba ne, har ma suna da muhimmanci ga duniya baki daya. (Bilkisu Xin) 

Babban daraktan sashen musaya tsakanin sassan kasa da kasa a majalisar kasuwanci ta Sin da Afirka Joseph Olivier Mendo’o, ya ce kasar Sin ta gina wasu jerin dandali na hadin gwiwa, domin moriyar abokan tafiyarta membobin kasashe masu tasowa, da nufin hada kai wajen magance rashin daidaito a tsarin jagorancin duniya.  Mendo’o, wanda ya bayyana hakan ga kafar CGTN, a gefen dandalin tattauna batun jagorancin duniya na Xiong’an na shekarar nan ta 2026, ya ce “Kasashe masu tasowa ba wakilci suke bukata ba, burinsu shi ne a saurari muryoyinsu.”  Kazalika, jami’in ya ce kasar Sin karkashin shawarar inganta jagorancin duniya ko GGI, wadda ke ingiza gina tsarin jagorancin duniya mai karin adalci da daidaito, da samar da kyakkyawar duniya, ta zamo jigo wajen cimma wadannan matakai.  Dandalin Xiong’an na bana, zai gudana ne cikin kwanaki uku a sabon yankin Xiong’an na lardin Hebei na arewacin kasar Sin tun daga jiya Jumma’a, bisa taken “Sake gina kwarin gwiwa da hadin gwiwa: Sauye-sauye da ba a ga irinsu ba cikin karni, da kwaskwarima da inganta tsarin jagorancin duniya”.   A cewar mista Mendo’o, Sin ta gina jerin dandalin hadin kai, irinsu na hadin gwiwar Sin da Afirka wato FOCAC, ta kuma mara baya ga kungiyar tarayyar Afirka ta AU da ta shiga kungiyar G20, don yayata muryar kasashe masu tasowa.  Cikin jawabin da ya gabatar yayin bude dandalin na bana a jiya Jumma’a, ministan harkokin wajen kasar Sin Wang Yi, wanda kuma memba ne a ofishin siyasa na kwamitin kolin JKS, ya ce yana da muhimmanci a inganta wakilci, da muryar kasashe masu tasowa a harkokin kasa da kasa.  Game da hakan, Mendo’o ya ce kasashe masu tasowa, da suka hada da na nahiyar Afirka da kasar Sin, kamata ya yi su shiga a dama da su a fannin tsara dokokin gudanar da duniya.  Daga nan sai ya jaddada muhimmancin dunkulewar kasashe masu tasowa, a matsayin karfi guda don magance tarin kalubale yadda ya kamata, duba da cewa daidaikun kasashe na iya samun saurin ci gaba, amma hadakar yunkurin bai daya, shi ne zai iya haifar da ci gaba na tsawon lokaci kuma mai game sassa masu nisa. Ya ce “Kasa daya cikin jerin kasashe masu tasowa ba za ta iya yin nisa ita kadai ba, amma idan mun dunkule tare za mu iya kaiwa wuri mai nisan gaske.” (Saminu Alhassan) 

Girgizar kasa mai karfin maki 7.0 ta afku a gundumar Baqen ta birnin Nagqu na jihar Xizang ta kasar Sin, da misali karfe 10:33 na dare a ranar 22 ga watan nan da muke ciki, inda ta yi sanadin mutuwar mutane da jikkata masu yawa.  Bayan abkuwar ibtila’in, shugaban kasar Sin Xi Jinping ya mayar da hankali matuka kan lamarin kuma ya ba da umarni cewa, dole ne a yi bakin kokarin ceto mutanen da ibtila’in ya rutsa da su, da jinyar wadanda suka jikkata, domin a rage mutuwar mutane.  Xi kuma ya jaddada cewa, yankin da girgizar ta abku yana cikin yanki mai tsayi da sanyi, don haka dole ne a sa ido sosai kan yanayin kasan wurin da canjin yanayi, kuma a gudanar da aikin ceto yadda ya kamata, da kandagarkin hadarin abkuwar kanana masu biyo baya.   Kazalika, ya kara da cewa, dole ne a hanzarta tura kayayyakin agaji na ceto da tsugunar da mutane yadda ya kamata, kana da gyara ababen more rayuwa da suka lalace tare da tabbatar da kare lafiyar rayuka da dukiyar jama'a.   A cewar rahoton da hukumar ba da agajin gaggawa ta birnin ta fitar, mutane 16 sun rasu yayin da 32 suka jikkata, a misalin karfe 3 da saura minti 5 na safiyar yau Juma’a, 11 daga cikin 32 da suka jikkata suna cikin mawuyacin hali, yayin da raguwar 21 kuma suka samu kananan raunuka, sannan gidaje sama da 300 sun rushe.  Zuwa yanzu ana ci gaba da auna girman barnan da girgizar kasar ta yi, sannan ayyukan rage radadi na ci gaba da gudana a yankin.  Sama da jami’an ’yan sanda 300 aka aika wurin da abin ya afku domin ayyukan rage radadi, yayin da hukumar kashe gobara da bayar da ayyukan ceto ta aika jami’ai 347 zuwa yankunan da abin ya rutsa da su. (Amina Xu)