Farashin tumatir ya ci gaba da tashi a kasuwannin jihar Legas, duk da raguwar farashin barkono da ta ɗan sauƙaƙa wa ƴan kasuwa da masu sayayya.
Rahoton Kamfanin Dillancin Labarai na Nijeriya (NAN), ya nuna cewa tsadar tumatir na rage yawan cinikayya tare da ƙara wa iyalai kashe kuɗin sayen a kayan abinci.
Wani mai sayar da tumatir a tashar mota ta Costain, Malam Mohammed, ya ce farashin kwanon tumatir da a watan Agusta da Satumba yake ₦6,000 ya tashi zuwa ₦7,000. Haka kuma, farashin kwando ya ƙaru daga tsakanin ₦35,000 zuwa ₦40,000 zuwa tsakanin ₦45,000 da ₦65,000, gwargwadon iri da girman tumatir.
Wata ƴar kasuwa, Rukayat Sherif, ta ce kwandon tumatir irin na Ghana yanzu yana tsakanin ₦40,000 da ₦45,000, yayin da a watan Agusta da Satumba ake sayar da shi kan ₦50,000 ko fiye. Ta ƙara da cewa farashin ƙaramin buhun Attaruhu ya sauka daga tsakanin ₦30,000 da ₦35,000 zuwa tsakanin ₦20,000 da ₦25,000.
Masu sayar da Attaruhu sun danganta sauƙin farashinsa da ƙaruwa da ake samu a kasuwa a wannan lokaci na kakar girbi. Sai dai sun bayyana cewa kuɗin sufuri da lodin kaya na ci gaba da shafar farashin da suke sayarwa. Wasu masu sayayya sun ce Attaruhu ya fi sauƙin samu a yanzu, lamarin da ke ba su damar sayen mai yawa da kuɗin da suke da shi.
Mary Chigozie, wata mazauniyar Costain, ta ce tsadar tumatir ta tilasta mata rage yawan wanda take amfani da shi wajen girki, inda wasu lokuta take haɗa Attaruhu da tumatir ko kuma ta dafa miyar ja da man ja. Masu sayayya sun yi kira ga gwamnati da ta tallafa wa manoma tare da samar da wuraren sarrafa kayan amfanin gona da adana su, domin rage ɓarnar abinci da kuma daidaita farashi a lokutan da kayan suka yi ƙaranci.
