Wata mata da ɗanta sun mutu bayan manyan motoci biyu masu ɗauke da kwantenoni sun kife a Mile 2, kusa da kasuwar Freeman, a hanyar zuwa Apapa, da ke jihar Legas.
Hukumar Kula da Zirga-Zirgar Ababen Hawa ta Jihar Legas (LASTMA) ta ce lamarin ya faru ne a ƙarshen mako, inda motocin, kowannensu ɗauke da kwantena mai ƙafa 20, suka kife tare da danne waɗanda suka mutu a ƙarƙashinsu da kayan da suke ɗauke da su.
Bayan faruwar hatsarin, jami’an ceto na LASTMA sun killace ɓangaren hanyar da abin ya shafa, tare da karkatar da ababen hawa zuwa wata hanyar gefe domin rage cunkoso da hana aukuwar wani hatsarin. Hukumar ta kuma yi amfani da na’urar ɗagawa da babbar motar jan ababen hawa wajen kwashe motocin da kwantenoninsu, yayin da jami’an ƴansanda suka samar da tsaro a wurin.
Daga bisani, an kai gawarwakin mamatan ɗakin ajiyar gawawwaki na ƴansanda da ke Yaba domin gudanar da matakan da suka dace. Babban Manajan LASTMA, Olalekan Bakare-Oki, ya bayyana alhininsa kan rasuwar mutanen, tare da miƙa ta’aziyyarsa ga iyalansu.
Bakare-Oki ya yi kira ga hukumomin tsaro da su gudanar da cikakken bincike domin gano musabbabin hatsarin, ciki har da yiwuwar matsalar injin motocin, ɗaukar kaya fiye da kima, rashin daidaita kaya yadda ya kamata ko sakacin direbobi.
Ya kuma buƙaci masu motocin dakon kaya su riƙa tabbatar da ingancin motocinsu, ɗaure kayansu yadda ya dace da kuma bin ƙa’idojin kiyaye lafiyar hanya domin rage aukuwar irin waɗannan asarar rayuka.
