Ranar 25 ga watan Oktoban nan, ita ce ta cika shekaru 55 da maido wa kasar Sin halastacciyar kujerarta a Majalisar Dinkin Duniya (MDD). A cikin wata makala mai taken "Daga Geneva zuwa shekaru 55 na alakar Sin da MDD" wadda aka rubuta domin wannan lokaci, Jia Guide, wakilin dindindin na kasar Sin a ofishin MDD da ke Geneva da sauran kungiyoyin kasa da kasa, ya bayyana cewa kasar Sin a shirye take ta yi aiki tare da dukkan bangarori domin karfafa rawar da MDD ke takawa, da kuma inganta tsarin mabambantan bangarori.  Jia Guide ya ce, a matsayinta na mambar da aka kafa MDD da ita kuma mamba ta dindindin a kwamitin sulhu, Sin ta kasance a koyaushe tana goyon bayan ci gaba da bunkasa ginshikai uku na MDD, wato zaman lafiya da tsaro, ci gaba, da kuma kare hakkin dan Adam. A matsayinta na kasa daya tilo a duniya da ta rubuta kudurin bin hanyar samun ci gaba cikin lumana a cikin kundin tsarin mulkinta, Sin ta kasance a koyaushe tana bin manufar hulda da kasashen waje ta zaman lafiya mai zaman kanta kuma ta tura sama da sojojin kiyaye zaman lafiya 50,000, wanda hakan ya sanya ta zama babbar mai ba da gudummawar dakarun kiyaye zaman lafiya kuma ta biyu mafi bayar da gudummawar kudi ga ayyukan kiyaye zaman lafiya na MDD a tsakanin membobin dindindin na kwamitin sulhu.  Jia Guide ya rubuta cewa, a 'yan shekarun baya-bayan nan, yayin da ake fuskantar muzgunawa daga bangare guda da kuma yanayi mai karo da juna, kasar Sin ta tsaya tsayin daka wajen kare manufofi da ka'idojin kundin tsarin MDD. Haka kuma, ta yi amfani da dandaloli da tsare-tsare daban-daban kamar na "Kungiyar Abokai kan Inganta Jagorancin Duniya" da ke Geneva da kuma "Ranar Tattaunawa a tsakanin Wayewar Kai Daban-daban ta Duniya", domin karfafa gwiwar al'ummar duniya wajen samar da cimma matsaya kan kiyaye tsarin mabambantan bangarori da kuma neman asalin ginshiki mafi girma da ya hade kowa da kowa. (Abdulrazaq Yahuza Jere) 

Daga ranar 23 zuwa 25 ga wata, kasashen Afrika 5 sun karbi bakuncin bikin nune-nunen hotuna, albarkacin cikar yankin Taiwan shekaru 81 da dawowa karkashin ikon mulkin kasar Sin. Kasashen 5 na Afrika sun hada da Kenya da Nijeriya da Afrika ta Kudu da Tanzania da kuma Mozambique.  A shekarar 2025, kwamitin dindindin na majalisar wakilan jama’ar kasar Sin ya yanke shawarar ayyana ranar 25 ga watan Oktoba a matsayin ta tunawa da Dawowar Taiwan Babban Yankin Sin, da kokarin kare nasarorin yakin duniya na II da ma odar duniya bayan yakin.  Me karbar bakuncin wadannan nune-nune da kasashen Afrika suka yi yake nufi?   Amincewa da kiyaye manufar “kasar Sin daya tak a duniya,” da kasancewar Taiwan wani bangare na kasar da ba zai iya ballewa ba, ita ce tushen kulla dangantaka tsakanin  Sin da daukacin kasashen duniya.   Batun da ya shafi yankin Taiwan, batu ne mai muhimmanci ga kasar Sin, kuma batu ne na cikin gida. Don haka, ba shakka yadda kasashen Afrika suka karbi bakuncin nune-nune ya kara tabbatar da yadda suke girmama cikakken ’yancin Sin da iko kan yankunanta. Ya kara bayyana mana kyakkyawar alakar dake tsakanin bangarorin biyu, domin ya nuna cewa, yadda Sin ke tsaya musu a dandalin kasa da kasa da yadda take goyon bayan ci gabansu, su ma suna girmama burika da muradunta. Wannan ita ce abota ta kwarai da aminci bisa mutuntawa da girmama juna.     Duk da cewa wasu kasashe na ingizawa tare da aikewa da mummunan sako ga masu neman ballewa da samun ’yancin kan Taiwan, kasar Sin ta tsaya tsayin daka wajen kare nasarorin da aka samu bayan yakin duniya na II. Cikin shekaru 81 da suka gabata, daya daga cikin nasarori mafiya muhimmanci ita ce, kokarin Sin na ci gaba da tabbatar da kasancewar Taiwan wani bangare na kasar, da kokarin tabbatar da dunkulewar kasar da ma son ganin ci gaban yankin, kamar yadda ya dace babbar kasa ta yi.  Wannan kadai, ya isa nunawa masu neman ballewa da magoya bayansu cewa, hakarsu ba za ta taba cimma ruwa ba. Kuma yayin da tsarin duniya ya sauya, watau kai ya waye, kasashe masu tasowa suke samun ci gaba cikin sauri da kokarin dogaro da kansu (godiya ga kasar Sin), ba za su bari hannun agogo ya koma baya ba, za su hada hannu da Sin wajen samar da duniya mai daidaito da adalci da rarrabuwar iko tsakanin kasa da kasa. Kuma ba makawa za su bayar da gagarumar gudunmuwa wajen ganin dunkulewar dukkanin yankunan Sin wuri guda, maimakon ballewar wani yanki. (Fa’iza Mustapha) 

An gabatar da nune-nunen hotuna, albarkacin cikar Taiwan shekaru 81 da dawowa karkashin ikon kasar Sin, a kasashe 5 na...

Tun bayan shiga sabuwar shekarar nan ta 2026, ma’aikatar cinikayya ta kasar Sin ta aiwatar da kudurori yadda ya kamata, tare da gudanar da manufofin kwamitin kolin JKS da na majalisar zartarwar kasar, kana ta ingiza gina tsarin hada-hadar cinikayya na zamani, da yayata ci gaba bisa matsayin koli a fannin hada-hadar masana’antun sayayyar daidai da na sari.  Wasu alkaluma da hukumar kididdiga ta kasar ta fitar a baya bayan nan, sun nuna yadda daga watan Janairu zuwa Satumban bana, yawan kudaden harajin VAT na masana’antun kasar a fannin sayayyar daidai da sari ya kai kudin Sin yuan tiriliyan 11.1, adadin da ya karu da kaso 4.4 bisa dari a mizanin shekara-shekara, kana ya kai kaso 10.4 bisa dari na jimillar GDPn kasar.   Kazalika, gaba daya ci gaban ayyukan masana’antun kasar yana kara bunkasa, tare da samar da tallafi mai karfi na fadadar bukatun cikin gida a dukkanin fannoni, da kuma karfafa hada-hadar hajoji a cikin gida. (Saminu Alhassan) 

Tun daga yau Litinin 26 zuwa Alhamis 29 ga watan nan na Oktoba, kwamitin tsakiya na 20 na jam’iyyar kwaminis ta kasar Sin, zai gudanar da cikakken zama na biyar a birnin Beijing.   Babbar ajandar taron na wannan karo ita ce: Hukumar siyasa ta kwamitin kolin JKS za ta gabatar da rahoton aiki na kwamitin tsakiya, da nazartar muhimman batutuwa masu nasaba da ci gaba da ingantawa da tsauraran matakan gudanar da mulki na jam'iyya daga dukkannin fannoni.   (Saminu Alhassan) 

A yayin da ake cika shekaru 81 da maido da Taiwan kasar Sin kuma cika shekara daya da kafa ranar maido da Taiwan kasar Sin, an gudanar da taron karawa juna sani na murnar cika shekaru 81 da maido da Taiwan kasar Sin a birnin Fuzhou dake lardin Fujian na kasar Sin a yau Lahadi 25 ga wannan wata.  A gun taron, direktan ofishin kula da harkokin yankin Taiwan na kwamitin tsakiya na jam’iyyar kwaminis ta Sin kuma na majalisar gudanarwar kasar Sin, Song Tao, ya bayyana cewa, jam’iyyar kwaminis ta Sin da kuma gwamnatin kasar Sin sun kafa ranar maido da Taiwan kasar Sin don shaida imanin kasar Sin na tabbatar da ikon mallakar kasa da kiyaye martabar yankunan kasar, da kuma tsayawa tsayin daka kan manufar Sin daya tak a duniya.  Ya kamata jama’ar gabobi biyu na mashigin tekun Taiwan su bi tunanin yaki da hare-hare tare da raya al’ummar kasar, da kin amincewa da duk wani irin yunkurin ‘yan aware na yankin Taiwan da kuma tsoma baki daga waje kan batun. (Zainab Zhang) 

A yau Lahadi, shugaban kasar Sin, Xi Jinping da Sarki Philippe na Belgium, sun taya juna murna bisa cika shekaru 55 da kulla alakar diflomasiyya tsakanin kasashen biyu.  Xi ya nuna cewa, a cikin shekaru 55 da suka gabata tun bayan kulla alakar diflomasiyyar, Sin da Belgium sun yi riko da ka'idojin girmama juna, daidaito, cin gajiyar juna da hadin gwiwa mai amfanar da juna, kuma dangantakar kasashen biyu ta bunkasa ba tare da tangarda ba.  Xi ya bayyana cewa yana ba da muhimmanci sosai ga ci gaban alakar da ke tsakanin kasar Sin da Belgium, kuma a shirye yake ya yi aiki tare da Sarki Philippe domin ba da jagoranci ga huldar abota da hadin gwiwa mai zurfi tsakanin kasashen biyu zuwa sabbin matakai na koli, tare da bayar da sabbin gudummawa wajen karfafa kyakkyawar alaka tsakanin Sin da Tarayyar Turai (EU) ba tare da tangarda ba.  A cikin sakonsa kuwa, Sarki Philippe ya ce ya yi amannar cewa bangarorin biyu za su gina a kan nasarorin da aka samu cikin shekaru 55 da suka gabata, domin kara inganta tattaunawa mai bude kofa, fadada hadin gwiwa a aikace, da kuma zurfafa fahimtar juna.  Ya ce, kasar Belgium a shirye take ta bunkasa dangantaka bisa daidaito da amfanar da juna tare da kasar Sin, da tunkarar dimbin kalubalen duniya na bai-daya, da karfafa zaman lafiya, kwanciyar hankali, da kuma ci gaba mai dorewa. (Abdulrazaq Yahuza Jere) 

Mai taimaka wa babban sakataren MDD Guy Ryder wanda ya zo kasar Sin don halartar dandalin tattauna batun jagorancin duniya na Xiongan na shekarar 2026, ya bayyana wa ‘yan jarida a jiya 24 ga wannan wata, a sabon yankin Xiongan dake lardin Hebei na kasar Sin cewa, kasar Sin ta taka muhimmiyar rawa wajen daidaita tafiyar da harkokin duniya, kuma shawarwari hudu da kasar Sin ta gabatar sun dace da burin MDD. A cewarsa, hangen nesa da kasar Sin ta yi ya burge sassan duniya, kuma wannan ne kasa da kasa suke bukata a halin yanzu.  Ryder ya bayyana cewa, MDD tana ci gaba da daukar kasar Sin a matsayin muhimmiyar abokiyar hadin gwiwa. Ya ce, shawarwari na duniya guda hudu da kasar Sin ta gabatar suna shafar fannonin samun ci gaba, da kiyaye tsaro, da raya al’adu, da daidaita harkokin kasa da kasa da sauransu, wadanda suka dace da burin tsarin bangarori daban daban ciki har da burin MDD. A lokuta da dama, kasar Sin ta nuna goyon baya ga ra’ayin bangarori daban daban da kuma MDD, ta ce za ta tabbatar da kiyaye tsarin duniya a karkashin tushen MDD, da kuma odar kasa da kasa bisa tushen dokokin kasa da kasa.   Ryder ya kara da cewa, hadin gwiwar dake tsakanin Sin da sauran kasashe masu tasowa na duniya ya kasance alamarta yayin da take daidaita tafiyar da harkokin duniya. Ya ce, a shekaru 81 da suka gabata, MDD na da membobi guda 51 ne kawai yayin da aka kafa ta, amma ya zuwa yanzu, yawansu ya karu zuwa 193, inda hakan ya nuna cewa, kasashe masu tasowa na duniya sun riga sun shiga harkokin duniya a dukkan fannoni. Amma kuma tsarin jagorancin harkokin duniya na yanzu bai mika cikakken ikon yin magana ga kasashe masu tasowa ba. (Zainab Zhang) 

A yau Lahadi, kasar Sin ta harba rokar dakon kaya kirar Long March-8A daga tsibirin lardin Hainan na kudancin kasar,...

Daraktan Hukumar Lafiya ta Duniya (WHO) na yankin Yammacin Pacific, Saia Ma'u Piukala ya bayyana cewa, kasar Sin tana taka muhimmiyar rawa wajen habaka ci gaban magungunan gargajiya a duniya, ta hanyar amfani da gogewarta wajen hade magungunan gargajiya da tsarin kiwon lafiya na gaba daya.   A wata hira da kamfanin dillancin labarai na Xinhua dangane da babban taron duniya kan magungunan gargajiya na shekarar 2026, Piukala ya bayyana cewa, idan aka hade magungunan gargajiya da tsarin kiwon lafiya yadda ya kamata, magungunan gargajiyar za su iya inganta kyakkyawan sakamakon kiwon lafiya ta hanyar fadada damar samun ayyukan kiwon lafiya, musamman a matakin farko na kula da lafiya.  An gudanar da babban taron duniya kan magungunan gargajiya na shekarar 2026 ne a birnin Beijing, a ranakun 17 da 18 ga watan Oktoba.  A cewar Piukala, kasar Sin ta kafa tsarin magungunan gargajiya mai inganci wanda ya samu tallafi daga kakkarfan tsarin manufofi da kuma ci gaba da zuba jari a fannin ilimi da horaswa, bincike, samar da ayyukan hidimomi da iya tsara dokoki.    Kazalika, ya yi nuni da cewa, kwarewar da kasar Sin ta samu wajen hade magungunan gargajiya da tsarin kiwon lafiya a matakin farko da sauran ayyukan kiwon lafiya, yayin da take amfani da ka'idoji masu alaka da daidaita hadarin da za a fuskanta a bangaren magungunan da likitocin ba da magungunan gargajiyar ta dace kwarai da gaske, musamman da sauran kasashe na yankin Yammacin Pacific.  Haka nan ya ce, kokarin da kasar Sin ke yi na karfafa horas da kwararru, da tabbatar da inganci da kuma binciken kimiyya, shi ma yana ba da darussa masu alfanu domin inganta aminci da ingancin magungunan gargajiyar da kuma taimaka wa mutane yanke shawara mai kyau game da amfani da su. (Abdulrazaq Yahuza Jere)