An bude gasar nuna kwarewar aiki karo na 48 a birnin Shanghai a jiya Talata, inda mutane 1,385 daga kasashe 68 za su fafata a fannoni 64 na gasar.   Kasar Sin, na da wakilai 71 da za su fafata a fannoni 64 da aka tsara, wanda a cewar masu shirya gasar, ya hade sassa 6 da suka kunshi sufuri da jigilar kayayyaki, fasahar gine-gine, fasahar kere-kere da injiniyanci, fasahar sadarwa da yada labarai, kirkire-kirkire, da ayyukan zamantakewa da hidimomin kai.  Gasar ta bana an yi mata take da ”kware a aikinka domin canza rayuwarka”, inda ta hada kwararrun matasa daga kowanne lungu da sako na duniya, domin su nuna gogewarsu da kuma musayar kwarewa a tsakaninsu.   Firaministan kasar Sin Li Qiang, ya halarci bikin bude gasar tare da gabatar da jawabi.  Li Qiang, ya ce shugaban kasar Sin Xi Jinping a cikin wasikar taya murna da ya aike ga taron kwarewar sana’o’i na duniya karo na 48, ya yaba da rawar da gasar ke takawa a matsayin dandalin musayar kwarewar sana’o’i ta duniya, kuma ya bayyana matsayin Sin na goyon bayan ci gaban harkokin kwarewar sana’o’i na duniya. Wannan taron mai taken “kwarewar sana’o’i tana haskaka makoma”, wanda hakan ya dace da ci gaban zamani.   Li ya kuma gabatar da jawabi yana mai cew,a da farko, nasarorin ci gaban Sin suna dogaro da gudummawa ta musamman daga fannin kwarewar sana’o’i. Na biyu, Sin ta ci gaba da kokarin bunkasa karfin kwarewar ma’aikata. Na uku, tana yin hadin gwiwa wajen kafa kyakkyawar makoma ta ci gaban kwarewar sana’o’i.  Firaministan Malaysia Anwar Ibrahim, da shugaban kungiyar kwarewar sana’o’i ta duniya ‌Francis Hourant da sauran baki sun halarci bikin, kuma a cikin jawabansu, sun jinjinawa yadda gwamnatin Sin ta jima tana aiki tukuru wajen horar da kwararrun sana’o’i, wanda hakan ke ba da karfi ga ci gaban tattalin arziki da zamantakewarta, kana yake ba da gudummawa mai muhimmanci a fannin habaka harkokin kwarewar sana’o'i na duniya da ci gaban matasa. Ci gaban kwarewar sana’o’i ya zama abin da gwamnatocin kasashe suka sa a gaba, kuma bangarori daban-daban na fatan karfafa gogewa tare da Sin, domin mayar da kwarewar ta zama wata muhimmiyar hanya ta hadin gwiwa dake kawo moriya ga kowa.  (Mai Fassara: Suleiman Suleiman, Amina Xu) 

Babban taron zauren MDD (UNGA) karo na 81 da ake gudanarwa daga ranar Talata 22 zuwa Litinin 28 ga Satumban 2026, ya zo a wani irin lokaci da duniya ta shiga tsaka-mai-wuya bisa yake-yake daban-daban da ake fama da su, da rashin girmama tsarin dokokin kasa da kasa, da hamayyar manyan kasashe masu kumbar susa da kuma rarrabuwar kawuna a tsakanin kasashe masu fada-a-ji.  Rahoton da cibiyar bincike kan sha’anin zaman lafiya ta kasa da kasa da ke Stockholm ta kasar Sweden (SPRI) ta fitar a 2026, ya ce adadin mutane da aka kashe, da wadanda aka raba su da gidajensu ko suke bukatar agajin jin kai saboda yake-yake, sun kai wani adadi da ba a taba gani ba a cikin gomman shekaru. Don haka, a yayin da ake gudanar da wannan taro na zauren MDD, kasashen duniya suna da wani babban nauyi da ya kamata su sauke daga wuyansu.  Kasar Sin, a matsayin babbar kasa da ke kokarin sauke nauyin da ya rataya a wuyanta, ta sha nanata kiraye-kirayen bin tafarkin amfani da ka’idojin kundin tsarin MDD, musamman ma kan abin da ya shafi kiyaye ’yancin kasashe da martabar yankunansu, da rashin tsoma baki cikin harkokin gidansu, da hana barazana ko amfani da karfi wajen warware takaddama. Kasar Sin ta sha jaddada cewa ya kamata a yi amfani da dokokin kasa da kasa cikin daidaito, ba tare da ware wasu shafaffu da mai ba.  Yayin da mataimakin shugaban kasar Sin, Han Zheng zai wakilci kasar a babban taron na UNGA daga ranar 24 zuwa 26 ga watan, ana dakon sakon da kasar Sin za ta gabatar wa duniya a wannan karo. Kuma bisa yanayin rawar da kasar take takawa wajen kiyaye tsarin kasa da kasa na mabambantan bangarori, ina da yakini za ta sake jaddada batun yin hadin gwiwar kasashe wajen tunkarar kalubalen da ake fuskanta.  Ko shakka babu, duniya tana bukatar wannan taro kar ya zamo na shan shayi a watse, kuma duk da ba shi da karfin ikon tursasa kafa doka ko daukar mataki, kasashe za su iya cimma matsaya kan matsin lambar diflomasiyya wajen warware tarin matsalolin da ke jibge, da suka shafi ba da fifiko ga dakatar da yake-yake, da agajin jin kai na fararen hula, da kuma rungumar shawarar inganta sha’anin tsaro na bai-daya kamar yadda Sin ta gabatar.  Bugu da kari, kamar yadda aka sani, zaman lafiya ba zai iya samuwa yadda ya kamata a yanayi na kangin talauci, da karancin abinci, da rashin daidaito da sauran abubuwa masu nasaba ba, ya kamata kasashe su duba manufar samar da ci gaban duniya na bai-daya wadda ita ma tana cikin manyan shawarwarin da Sin ta gabatar.  Kazalika, sauran batutuwa da suka shafi cinikayya da fasahohin zamani duk suna bukatar daukar kwararan matakai tare da kyakkyawan hadin gwiwa mai karfi ta yadda za a samu mafita mafi dacewa kan matsalolin da ake fama da su da kuma masu kunno kai. Kuma wannan taro na UNGA karo na 81, wata sabuwar gaba ce da za a iya amfani da ita kan cimma wannan buri, don haka bai kamata kasashe su bari ya zama na shan shayi kawai ba. (Abdulrazaq Yahuza Jere) 

Liu Guozhong, mamba a ofishin siyasa na kwamitin kolin jam’iyyar kwaminis ta Sin, kuma mataimakin firaministan kasar, ya kai rangadin...

An gudanar da bikin karrama ’yan sama jannati na ayyukan kumbunan Shenzhou-20 da Shenzhou-21 na kasar Sin, a birnin Beijing yau Laraba.  Zhang Shengmin, mataimakin shugaban hukumar soja ta tsakiya, ya mika lambobin yabo da takardun shaida ga ’yan sama jannatin kumbon Shenzhou-20, wadanda su ne, Chen Dong, Chen Zhongrui da Wang Jie, da kuma na kumbon Shenzhou-21, wadanda suka hada da Zhang Lu, Wu Fei da kuma Zhang Hongzhang. (Abdulrazaq Yahuza Jere) 

Yau ranar 23 ga watan Satumba ita ce ranar bikin girbi na manoman kasar Sin karo na 9. A daidai wannan lokaci mai farin ciki, bari mu duba wasu alkaluma masu alaka da ci gaban ayyukan noma na Sin. A shekarar 2025, yawan amfanin gona na Sin ya ci gaba da kasancewa da adadin tan miliyan 700, kuma yawan gonakin noma masu inganci da aka kafa ya kai sama da hekta miliyan 66.67. Yawan matsakaicin kudin shiga na kowane mazaunin karkara ya kai yuan 24456, wanda ya karu da kashi 6% idan an kwatanta da shekarar da ta gabaci hakan, har yawan karuwarsa ya fi na mazauna birane da kashi 1.8%. Har ila yau, kason ayyukan gona da aka gudanar da injuna a fadin kasar ya wuce kashi 76%, kuma gudummawar da fasahohin zamani suka bayar ga ci gaban aikin noma ya wuce kashi 64%.  Lallai ci gaban da Sin take samu a fannin aikin noma na da alaka matuka da kwaskwarimar da take yi a wannan fanni, wato yadda ta karkata daga “dogaro da yanayi” zuwa “raya fasahohin zamani”. Kuma dabarun da Sin take samu daga ayyukan gona suna kuma amfanar da nahiyar Afirka.  A kauyen Midekin na Chadi, gonakin gwaji da tawagar kwararrun aikin gona ta Sin suka kafa a wurin, suna iya samar da shinkafa sama da tan 10.03 a kan kowace hekta, wanda ya kusan ninka matsakaicin yawan shinkafar da a kan samu a wurin har sau 3. Tawagar kuma ta gina karamar masana’antar sarrafa shinkafa, inda ta hakan ake iya “girbe shinkafa da safe, tare da sarrafa su da tsakar rana kuma a sayar da su da yamma”.  Sai kuma a lardin Mashonaland ta Yamma na Zimbabwe, tawagar kwararrun Sin ta gina “gidan renon kaji”, inda ake amfani da injin kyankyashe kwan kaji da Sin ta kera, kuma yawan kaji da inji ke iya kyankyasa a kowane wata ya haura sama da 2000. Hakan ya sa mazaunin wani kauye Nomusa Ncube ke iya samun kudin shiga kusan dala 320 a kowane wata, wanda da hakan muke ganin cewa, fasahohin kasar Sin ta kara wa manoman Afirka karfin aljihunsu.  Har wa yau, Samson Mofolo, dalibin da ya yi karatun digiri na 3 da jami’ar aikin gona ta kasar Sin ta horar karkashin shirin hadin gwiwar Sin da Afirka a bangaren aikin noma, yanzu haka yana aiki a cibiyar yada fasahar noma ta gundumar Lisasadzi ta Malawi, yana kokarin koyar da fasahohi masu alaka da taki, da shuka iri. Yanzu amfanin gona da ake shukawa a gonaki na zama kudin shiga ga manoma.  Duk matakan da Sin take dauka a Afirka na bayyana cewa, ba kawai ba da kudi da kaya kasar Sin take yi ba, tana kuma kai fasahohin noma da dabarunta da tsarin harkokin masana’antu zuwa Afirka, domin taimaka wa manoman Afirka su dogara da karfin kansu.  Ban da wannan kuma, a ranar 1 ga watan Mayu na bana, Sin ta fara aiwatar da manufar soke gaba dayan harajin kwastam kan kasashen Afirka 53 da ke da huldar diflomasiyya da ita, wanda hakan ya sa kayayyakin noma masu inganci na Afirka suke iya shiga kasuwar Sin ba tare da biyan haraji ba. Kayayyakin noma na Afirka ba wai kawai yawansu ya karu ba, har ma hanyar sayar da su ma ta habaka.  Samun girbi mai armashi ba nasara ga kasar Sin ba kadai, haka kuma nasara ce ta hadin gwiwar Sin da Afirka. Yayin da manoman Sin ke murnar bikin girbi, a sa’i daya kuma manoman Afirka ma suna cin gajiya.  Bikin girbi na manoma ba wai kawai murna da yin girbi mai armashi a wata shekara ba ne, har ila yau ya kasance amsa ga tambayar “yaya za a samu isasshen abinci”. Sin ta kwashe shekaru da dama tana warware wannan matsala, kuma yanzu tana kokarin taimaka wa Afirka wajen warware wannan matsala bisa fasaha da iliminta.  Gonakin shinkafa na Chadi, gidan kaji na Zimbabwe, aikin hadin gwiwar Sin da Afirka na fasahar noma na Malawi da sauransu, dukkansu sun bayyana yadda dabarun Sin ke amfanar da al’ummar Afirka, kuma girbin manoman Afirka zai zama wata kyakkyawar shaida ga zumunci da hadin gwiwarsu.(Marubuciya: MINA)  

A yammacin yau Laraba 23 ga wata, shugaban kasar Sin Xi Jinping ya tashi daga birnin Beijing zuwa kasar Amurka,...

Shugaba Xi Jinping na kasar Sin, ya aika da wasikar taya murna ga gasar sana’o’in fasaha ta duniya karo na...

Wasu alkaluman haraji na baya bayan nan da aka fitar a jiya Litinin, sun nuna yadda kasar Sin ke samun...

Bayanin da hukumar makamashin kasar Sin ta fidda, ya nuna cewa, a tsakanin watan Janairu zuwa watan Agustan bana, yawan...

Da yammacin yau Talata 22 ga watan Satumba, firaministan kasar Sin, Li Qiang, ya gana da Francis Hourant, shugaban kungiyar sana’o’in fasaha ta kasa da kasa, da David Hoey, babban jami’in gudanarwarta a birnin Shanghai, wadanda suka zo kasar Sin domin halartar gasar sana’o’in fasaha ta kasa da kasa karo na 48.  Li Qiang ya bayyana cewa, kasar Sin na da kwarin gwiwar yin aiki tare da dukkan bangarori domin gabatar wa duniya wani babban bikin sana’o’in fasaha na musamman. Kasar Sin a shirye take ta kara zurfafa hadin gwiwa da kungiyar sana’o’in fasahar, da yin hadin gwiwar zurfafa ci gaban fannin sana’o’in fasaha a duniya, da bunkasa tattalin arzikin duniya mai dorewa cikin kwanciyar hankali, kana da kyautata jin dadin al’ummomin dukkan kasashe.  Za a gudanar da gasar sana’o’in fasaha ta kasa da kasa karo na 48 ne a birnin Shanghai daga ranar 22 zuwa 27 ga watan Satumba, yayin da za a gudanar da bikin baje kolin kasuwancin fasahohin zamani na duniya karo na biyar a birnin Hangzhou na lardin Zhejiang, daga ranar 23 zuwa 27 ga watan Satumba.   Bisa gayyatar kasar Sin, firaministan kasar Malaysia, Anwar Ibrahim, zai halarci bikin bude gasar ta sana’o’in fasaha ta kasa da kasa da kuma bikin kaddamar da baje kolin kasuwancin fasahohin zamani na duniya. Bugu da kari, shugaban majalisar ministocin kasar Kyrgyzstan, Adylbek Aleshovich Kasymaliev, zai halarci bikin kaddamar da baje kolin kasuwancin fasahohin zamanin na duniya. (Abdulrazaq Yahuza Jere)