A yau Talata a birnin Nanjing, an gudanar da bikin sanya hannu kan yarjejeniyar “shirin karfafa manyan kamfanoni” tsakanin babban rukunin gidajen rediyo da talabijin na kasar Sin CMG da gwamnatin lardin Jiangsu, kana an gabatar da jerin ayyukan yada labarai na hadin gwiwa. Shen Haixiong, shugaban CMG ya halarci taron tare da gabatar da jawabi.  A jawabinsa Mr. Shen ya ce, a matsayin babban rukuni mafi girma, kuma mafi nau’ikan ayyuka da yada labarai ga wurare mafi yawa a duniya a yau, “shirin karfafa manyan kamfanoni” na CMG na ci gaba da karfafa wa manyan kamfanonin Sin gwiwa don su zama sahun gaba da fadada tasirinsu a duniya. Ya ce CMG zai ci gaba da yada labaran da suka shafi Jiangsu, da kara hadin gwiwa wajen karfafa wa manyan kamfanonin gwiwa, da zurfafa hadin gwiwar kirkire-kirkire tsakanin gwamnatin tsakiya da mabambantan wurare na kasar, kana da amfani da hanyoyin kirkire-kirkire wajen taimaka wa manyan kamfanonin Jiangsu yada tasirinsu ba iyaka.  Haka zalika a yau din, an gudanar da taron “fafatawar fasaha: babban baje kolin fasahar amfani da na’urorin mutum-mutumin inji, karo na farko” na CMG, zangon Nanjing. (Amina Xu) 

Kai Ziyara “Haikalin Masu Laifin Yaki” Da ’Yan Siyasar Japan Suka Yi Yunkuri Ne Na Farfado Da Ra’ayin Fin Karfin Soja  Firaministan Japan Sanae Takaichi ta ziyarci “Haikalin masu laifin yaki” tare da ba da hadaya da kudaden hadaya a ranekun 17 da 19 ga watan Oktoba. Bugu da kari, wasu jami’an majalisar gudanarwa ta Japan da manyan jami’an jam’iyyar Liberal Democratic Party da dama su ma sun ziyarci haikalin. Wannan ya bayyana yunkurinsu na gyara zalunci da mamaya da masu aikata laifin yaki na Japan suka yi a yakin duniya na biyu, da nufin “farfado da ra’ayin fin karfin soja”.  A shekarar 1978, masu ra’ayin rikau na Japan suka shigar da kaburburan masu laifin yakin duniya na biyu cikin sirri a haikalin Yasukuni inda ake kiran shi “Haikalin masu laifin yaki” a halin yanzu. Sanae Takaichi ta yi wa haikalin lakabin “haikalin zaman lafiya” a fili, kuma cikin kusan shekaru 20 da suka gabata, a kusan kowace shekara tana tunawa da wadannan masu aikata laifin yaki, da nufin musanta hukuncin da kasashen duniya suka yi wa Japan a tarihi a kotun Tokyo, da kalubalantar adalci da gaskiyar kasa da kasa da da’ar bil’adama.  Abin da ya kamata a lura da shi shi ne, masu ra’ayin rikau na Japan sun kara daukar matakan jirkita tarihi, wanda ke da mugun nufi na hanzarta “farfado da ra’ayin fin karfin soja”. Game da ayyukan da masu ra’ayin rikau na Japan ke yi na kalubalantar tsarin duniya bayan yakin duniya na biyu da farfado da ra'ayin fin karfin soja, Sin da sauran kasashen da aka zalunta a yakin duniya na biyu ba za su yi shiru ba. Idan wasu daga cikin Japanawa suna nufin bin tsohuwar hanyar mamaya da fadada da zalunci, to tabbas za a yi musu cikakken hukunci da martani. (Amina Xu)  Kai Ziyara “Haikalin Masu Laifin Yaki” Da ’Yan Siyasar Japan Suka Yi Yunkuri Ne Na Farfado...

Shugaban kasar Sin Xi Jinping, ya aike da sako don taya cibiyar horar da ra’ayin gurguzu ta Sin murnar cika shekaru 70 da kafuwa.   Cikin wasikar, Xi Jinping wanda kuma shi ne sakatare janar na kwamitin kolin JKS, kuma shugaban hukumar koli ta sojin kasar, ya yaba wa cibiyar bisa horar da adadi mai yawa na wadanda ba 'yan JKS ba, wadada suke da akidu irin na jam'iyyar, kuma suke aiki tare da ita cikin hadin gwiwa domin cimma burikan kasar. Ya kuma yaba da yadda cibiyar ta bayar da muhimman gudunmuwa wajen karfafa kishin kasa da hadin kai cikin shekaru 70 da suka gabata.   Haka kuma, shugaba Xi ya karfafa wa cibiyar gwiwar ci gaba da karfafa horon siyasa da samar da daidaito kan harkokin siyasa daban-daban da kuma kara ingancin ayyukan koyarwa da bincike da karfinta na tafiyar da harkoki. (Fa’iza Mustapha) 

Bisa lissafi na farko-farko, alkaluman GDP na kasar Sin sun kai yuan triliyan 10.71071 a rubu’i 3 na farkon bana, inda aka samu karuwar kaso 4.6 a mizanin shekara-shekara. Kafofin yada labarai na kasa da kasa kamar BBC da Reuters, sun gabatar da nasu sharhi masu take daban-daban kamar “Tattalin Arzikin Sin ya Karu a Q1-Q3” da “Ci Gaban Tattalin Arzikin Sin daga Q1-Q3 ya Wuce Tsammani”…   Bisa kididdiga, gudunmuwar da manyan masana’antu na kasar suka bayar ga tattalin arzikin ya karu da kaso 5.3 cikin rubu’i 3 na bana, yayin da sayayyar kayayyaki da na hidimomi ta karu da kaso 2.6. Galibin ma’aunan tattalin arziki sun samu ci gaba, lamarin da ke nuna juriya da kuzarin habakar tattalin arzikin Sin da ma jaddada matsayinsa na mai ingiza ci gaban tattalin arzikin duniya.   Kasar Sin ta zama babbar abokiyar cinikayya ga kasashe da yankuna 169, inda jimilar kayayyakin da ke shiga kasar da ma wadanda ke fita ta karu da kaso 18.8 a mizanin shekara-shekara cikin rubu’in 3. Baya ga haka, karuwar kayayyakin da kasar Sin take saya daga ketare ta ci gaba da zarce kaso 20 cikin dukkan rubu’in 3, wadda ke kara nuna matsayin Sin na babbar mai saye da sayarwa.  Yanzu haka, yanayin duniya na cike da sarkakiya da sauye-sauye, kuma tubalin ingantuwar tattalin arzikin Sin yana bukatar karin karfi. Sai dai ya kamata a lura cewa, abubuwan dake ingiza ci gaba mai inganci a kasar na ci gaba da karuwa, lamarin da ke samar da goyon baya mai karfi ga burin kasar na samun karuwar tattalin arzikinta. (Fa’iza Mustapha) 

Kasar Sin ta fitar da wata takardar bayani a ranar Asabar, wadda ta ce a shekarun baya-bayan nan, tsarin ilimin sana’o’i na kasar, yana samar da matsakaicin adadi na kwararrun ma’aikata miliyan 10 ga masana’antu daban-daban a duk shekara.  Mun saba da jin “in dambu ya yi yawa ba ya jin mai” a matsayin dalili ko kuma hanyar lullube gazawar wani tsari. Tabbas ina da yakinin mutane da dama kamar ni, sun amince da hakan. Sai dai, zamana a kasar Sin da abubuwan da na shaida, sun fahimtar da ni cewa, “duk yawan dambu zai ji mai, sai dai in ba a zuba isasshe ba.” Kuma “yawan dambu” ba matsala ba ce, maimakon haka, hanya ce ta samun arziki da dogaro da kai.    “Dambu” a nan na nufin jama’a. A kasar Sin ne na ga yadda yawan jama’a ya zama alheri da hanyar samun wadata da dogaro da kai.  Maimakon yawan jama’a ya zama tasgaro ga ci gaban kasar, sai ya zama karfin da ke ingiza ci gaba da wadata da kwanciyar hankalinta.  Rashin aikin yi na zama babban dalilin dake haifar da talauci da aikata laifuffuka kamar sace-sace da fashi da makami, da tashe-tashen hankula da ake samu a cikin kasa.   Sanin hakan ne ya sa kasar Sin tashi tsaye wajen bunkasa samar da ilimin fasahohi da sana’o’in hannu, domin samar da guraben aikin yi da kwararru, wanda zuwa yanzu ya kara karkata ga inganta kwarewa da biyan bukatun da masana’antun kasar ke da su. Kasar Sin na da kimanin makarantun koyar da sana’o’i sama da 10,000 da suka hada da na matakin sakandare da na gaba da sakandare, wadanda ke da dalibai sama da 30,000. Wannan mataki ya ba yara da matasa damar gano basirar da suke da ita, da bayar da gudunmawa ga cimma burikansu. Haka kuma, wata hanya ce ta ba dalibai samun kwarin gwiwa, domin za su samu bangarorin da suka fi sha’awa da basira a kai don raya su. Wannan ya saba da tsarin nan na lallai sai an yi karatu kan wasu takaitattun fannoni da watakila dalibi ba shi da sha’awarsu. Mutane sun bambanta, watau yayin da wani ke son karatun zube, wani kwarewarsa na ga bangaren abubuwan da zai iya yi da hannayensa. Wannan tsari na Sin yana ba da gudunmawa ga ci gaban kasa ta hanyoyi daban-daban, daga rage zaman kashe wando da aikata laifuka, zuwa biyan bukatun kasa da zama mai dogaro da kai da samar da al’umma mai ilimi da yaki da talauci da sauransu. Kuma shi ya ba kasar damar zama na daya a duniya a bangarori daban daban. Idan ba a manta ba, kasar Sin ce ta lashe gasar nuna kwarewar aiki ta kasa da kasa da aka yi a baya-bayan nan a birnin Shanghai a karo na 5 a jere, inda ta mamaye teburin lambobin yabo, ta lashe lambobin zinare 41 da azurfa 11 sai tagulla 4 da kuma lambobin yabo na kwarewa guda 6.   Hakika duk kasar da ta jajirce wajen wadata al’ummarta da ilimi daidai gwargado, ta ba matasanta damar nakaltar sana’o’i, to ta yi nisa a tafarkin ci gaba mai inganci, kuma ba makawa, ta tabbatar da tsara kyakkyawar makomarta. (Faeza Mustapha)

Mai magana da yawun ma’aikatar harkokin wajen kasar Sin Mao Ning, ta ce Sin na matukar Allah wadai da mummunan matakin Japan dangane da batun haikalin Yasukuni, ta kuma gabatar da kakkarfar adawar diflomasiyya, da korafi mai karfi ga bangaren Japan.  Mao Ning, ta bayyana hakan ne a Litinin din a birnin Beijing, yayin taron manema labarai na rana-rana da aka saba gudanarwa, bayan da firaministar Japan Sanae Takaichi ta aike da hadaya, da gudunmawar kudi ga haikalin Yasukuni a ranar Asabar 17 da yau Litinin 19 ga watan nan na Oktoba, kana jerin jami’an gwamnatin Japan, da manyan jami’an jam’iyyar LDP, da ‘yan majalisun dokokin kasar suka ziyarci haikalin cikin ‘yan kwanakin baya bayan nan.  Mao, ta jaddada cewa haikalin Yasukuni, wuri ne da aka binne ajin farko na muggan jami’an Japan su 14, dake da alhakin aikata laifukan yaki a lokacin yakin mamaya da ya shude.  Jami’ar ta kara da cewa, a bana ake cika shekaru 80 da bude shari’un birnin Tokyo, don haka ta kara jaddada matukar bukatar Japan, da ta fuskanci tarihi, ta yi duba dangane da laifukanta, kana ta dakatar da mayar da hannun agogo baya dangane da batutuwan tarihi, ta aiwatar da matakai na hakika, wadanda za su samar mata da amincewar makwaftanta na Asiya da ma sauran sassan kasa da kasa.   (Saminu Alhassan) 

Duk da taazzarar kika-kakar cinikayya, da karan-tsaye da tsarin hada-hadar hajoji na duniya ya fuskanta, an bude dandalin shekara-shekara na...

Kwanan baya, yayin ganawarsa da shugaban majalisar ministocin kasar Togo Faure Essozimna Gnassingbe, shugaban kasar Sin Xi Jinping ya gabatar da wasu ka’idoji 4, game da yadda bangarori daban-daban za su shiga a dama da su a fannin warware manyan batutuwan da ke ci wa nahiyar Afrika tuwo a kwarya.   Dangane da wannan batu, mai magana da yawun ma’aikatar harkokin wajen kasar Sin Mao Ning, ta bayyana cewa, wadannan ka’idoji suna da matukar muhimmanci wajen tunkarar manyan matsalolin da kasashen Afirka suke fuskanta, ciki har da halin da ake ciki a yanzu a yankin Kahon Afirka.  Mao Ning ta kara da cewa, ka’ida ta farko ita ce, daukaka shugabancin Afrika, watau al’ummar nahiyar ne ya kamata su zama jigon jagorantar harkokinta.  Ka’ida ta biyu, ita ce kiyaye adalci da gaskiya, watau ya kamata bangarori masu ruwa da tsaki su kiyaye manufofi da ka’idojin kundin tsarin dokokin MDD, da girmama cikakken ‘yanci da ikon kasashe masu ruwa da tsaki.  Ka’ida ta uku, ita ce dakatar da rikice-rikice da wanzar da zaman lafiya. Kasancewar yaki da kakaba takunkumai daga bangare guda, ba za su warware rikice-rikice tsakanin kasa da kasa ba, don haka ya zama wajibi a nacewa martaba juna, da tuntubar juna, da neman yanayin da zai karbu ga kowa tare da hakuri da bambance-bambance, da fahimta da hakuri da juna.  Sai ka’ida ta hudu, watau magance alamomi da tushen matsaloli. Ya ce ya kamata a yi kokarin mayar da hankali kan bukatun tsaro na gaggawa, yayin da ake tsara hanyoyin samun ci gaba mai dorewa. (Mai Fassara: Maryam Yang) 

Gwamnan babban bankin al’ummar kasar Sin Pan Gongsheng, ya ce za a kaddamar da matakin samar da tallafin tsabar kudade da nufin taimakawa cibiyoyin hada-hada da ba bankuna ba, ta yadda za su samu ikon biyan basussuka.  Pan Gongsheng, ya bayyana hakan ne a Litinin din nan, yayin bikin kaddamar da dandalin tattauna batutuwan hada-hadar kudi na shekarar nan ta 2026 a birnin Beijing, dandalin da ya samar da zarfin musayar ra’ayoyi tsakanin kusoshin manyan hukumomin dake lura da hada-hadar kudade na kasar Sin, dangane da manufofin da suke baiwa fifiko.  Pan, ya kuma yi karin haske game da tanade-tanade masu fadi dake kunshe cikin matakan inganta hada-hadar kudade, ciki har da kyautata kaidin farashin basussuka, da kyautata tsarin gudanar da cinikayyar ketare tsakanin hukumomi masu ruwa da tsaki, ta amfani da kudin Sin wato yuan a kasuwar musayar kudade ta kasar.  A daya bangaren kuma, shugaban babbar hukumar lura da hada-hadar kudade ta kasar Sin Ding Xiangqun, ya ce Sin za ta ci gaba da ingiza bude kofa a fannin hada-hadar kudade, da yiwa karin cibiyoyin hada-hadar kudi na ketare maraba, da kuma karbar karin kudaden jari na dogon zango.  Dandalin tattauna batutuwan hada-hadar kudi na shekarar nan ta 2026, na gudana ne tun daga yau Litinin 19 zuwa 22 ga watan nan na Oktoba a birnin Beijing, ya kuma hallara manyan baki sama da 400 daga kasashe da yankunan duniya sama da 40. (Saminu Alhassan) 

Da safiyar yau Litinin 19 ga watan Oktoba, firaministan Sin Li Qiang ya gana da shugaban Tajikistan Emomali Rahmon da kuma takwaransa na kasar Kokhir Rasulzoda a Dushanbe, babban birnin kasar.  A yayin da yake ganawa da shugaba Emomali Rahmon, Li Qiang ya ce, a halin yanzu, Sin da Tajikistan na ingiza gina kyakkyawar makomar al’ummarsu ta bai daya. Kuma Sin na fatan fadada cinikayyar shige da fice tsakanin kasashen biyu, da karfafa hadin gwiwa a fannin ababen more rayuwa, da hakar ma’adanai ba tare da gurbata muhali ba, da kara tuntubar juna, da fadada hadin gwiwa a sabbin masana’antu kamar tattalin arzikin yanar gizo da fasahar AI da sauransu, domin karfafa ci gaban tattalin arzikinsu.  Ya kara da cewa, ya kamata bangarorin biyu su zurfafa hadin gwiwa wajen aiwatar da doka a fannin tsaro, da karfafa musayar bayanai, da yaki da “’yan ta’adda da masu tsatsauran ra’ayin addini da ’yan aware”, da kiyaye zaman lafiya da kwanciyar hankali mai dorewa a yankin. Bugu da kari, Li Qiang ya ce, Sin na fatan karfafa mu’ammala da hadin gwiwa da Tajikistan karkashin tsarin gudanar da harkoki tsakanin mabambantan bangarori kamar su MDD da tsarin Sin da Asiya ta tsakiya, ta yadda za a aiwatar da manyan shawarwarin duniya guda hudu da shugaban kasar Sin Xi Jinping ya gabatar, da kuma gina kyakkyawar makomar al’ummar bil’adama ta bai daya.  A nasa bangaren, shugaba Rahmon ya ce, Tajikistan na fatan kara zurfafa hadin gwiwa da Sin a fannin cinikayya da masana’antu, da noma, da makamashi da ma’adinai da zirga-zirga, da fasahar AI, da ingiza musayar al’adu. Haka kuma, Tajikistan tana goyon bayan manyan shawarwarin duniya guda hudu da shugaba Xi ya gabatar, kuma tana fatan karfafa hadin gwiwa da Sin a MDD da kungiyar hadin gwiwa ta Shanghai SCO, da tsarin Sin da Asiya ta tsakiya da sauransu, domin ingiza dangantakar hadin gwiwar abokantaka bisa manyan tsare-tsare a dukkan fannoni ta sabon zamani tsakanin Tajikistan da Sin, da gina kyakkyawar makomar al’ummar kasashen biyu ta bai daya.   Kazalika, a wannan rana kuwa, Li Qiang ya gana da takwaransa na kasar Tajikistan Kokhir Rasulzoda. A ganawar tasu Li ya ce, Sin a shirye take domin yin aiki da Tajikistan wajen bunkasa shirin hadin gwiwar ayyukan ci gaba mai inganci a tsakaninsu.  Ya kuma kara da cewa, kasar Sin, na da niyyar daidaita dabarunta na ci gaba da Tajikistan, da karfafa hadin gwiwa ta fuskar cinikayya da zuba jari, da kyautata alaka, da ma’adanai marasa illa ga muhalli, da makamashi mai tsafta, da fasahar kirkirarriyar basira ta AI, da dai sauransu. Yayin da yake la'akari da halin da kasashe ke ci gaba da fuskanta na samun sauye-sauye masu sarkakiya, Li ya ce kasancewar su mambobi masu muhimmanci a kasashe masu tasowa, Sin da Tajikistan za su ci gaba da hada kai da kulla alakar kut da kut, domin kare muradun bai daya na kasashen biyu, da kare adalci da gaskiya a mu'amalar kasa da kasa. (Amina Xu, Suleiman Suleiman)