Ministan harkokin wajen kasar Sin Wang Yi, wanda ya kasance wakilin musamman na shugaban kasar Sin Xi Jinping, a taron karawa juna sani karo na bakwai, dangane da zakulo dabarun gina cudanya da kwarin gwiwa a shiyyar Asiya ko CICA a takaice, ya gabatar da jawabi a taron na jiya Alhamis, inda ya ce, kasashen Asiya ne suka kafa dandalin CICA, da nufin gudanar da shawarwari da hadin gwiwa.  Kuma tun kafuwarsa, CICA ya taka rawar gani wajen samar da nasarar muhimman kudurinsa biyar, wato wanzar da zaman lafiya tare, da bunkasa hadin gwiwa mai cikakken tsari bisa matakan gina kwarin gwiwa, da nacewa manufar cudanyar mabambantan sassa, da aiki tukuru wajen karfafa tushen gaskiya don cimma zaman lafiya da tsaro a Asiya.  Ya ce, kasar Sin na matukar jinjinawa kwazon kasar Azerbaijan, dangane da bunkasa hadin gwiwar dandalin yayin kasar ke jagorancinsa, kuma Sin a shirye take ta ci gaba da nuna matukar goyon baya da shiga a dama da ita a ayyukan dandalin. Wang ya kara da cewa, a gabar da ake ta fuskantar sauye-sauye cikin sauri irin wadanda ba a ga irinsu ba a cikin wani karni, ta hanyar hade kan al’ummu wuri guda bisa makomar bai daya, da kasancewa a bangaren gaskiya a tarihi, da rungumar goyon bayan juna, da hadin gwiwa ne kadai kasashen Asiya za su wuce gaba a lokuta daban daban, kana za su iya sauya kalubale zuwa damarmaki da hada hannu wajen samar da makoma mai nagarta. (Saminu Alhassan) 

Hukumar kididdiga ta kasar Sin ta ce abun da kasar ke kashewa a bangaren bincike da kirkire-kirkire (R&D), ya karu...

Cibiyar lura da harkokin waje ta alummar kasar Sin ta ce za a gudanar da dandalin tattaunawa, game da batun...

Yau Juma’a aka bude taron kasa da kasa na 2026 kan raya ilimin fasahohi da sana’o’in hannu a birnin Tianjin...

Yau Juma’a 16 ga watan Oktoba ita ce ranar abinci ta duniya, kuma taken ranar shi ne “Kirkira a yanzu, don tabbatar da samun isasshen abinci a gobe”.   Taken ranar ya nuna burin da aka sanya, wato tabbatar da samun isasshen abinci. Rahoton da hukumar abinci da noma ta Majalisar Dinkin Duniya FAO ta fitar kan kamfar abinci na duniya ya nuna cewa, har yanzu akwai mutane sama da miliyan 280 a duniya da ke fuskantar matsanancin karancin abinci. Yankin kahon Afirka, da yankin Sahel, da kudancin Afirka su ne yankunan da suka fi jin radadin matsalar.  A nata bangare, nasarorin da Sin ta samu a fannin tabbatar da samar da isasshen abinci sun jawo hankulan mutanen duniya. Alkaluma na nuna cewa, a shekarar 2025, yawan amfanin gona da aka girbe a kasar ta Sin ya kai matsayin sama da kilo biliyan 700 a ko wace shekara, kuma adadin abinci ga kowane mutum ya wuce kilogiram 480, wanda ya zarta layin tabbatar da samun isasshen abinci wato kilogiram 400 da duniya ta amince da shi.   Sin ba ta tsaya kan nasarorin da ta samu ba, ta san cewa tabbatar da samun isasshen abinci ba aikin kasa daya ba ne, nauyi ne dake wuyan al’ummar duniya baki daya.  A Madagascar, shinkafar da aka tagwaita irinta da ake kiranta da “Tsarabe”, wato “abu mafi kyau”, an buga hotonta a kan takardar kudi mafi daraja ta kasar. Ta wannan hanya Madagascar tana nuna girmamawa ga wani masanin ilimin aikin gona na kasar Sin, wato Yuan Longping. Madagascar ta sauya daga kasa mai shigar da abinci zuwa wata muhimmiyar kasar noman shinkafa a Afirka, bisa fasahar Yuan Longping ta samar da sabon iri ta hanyar tagwaita irin shinkafa.  Ban da wannan kuma, a kauyen Midekin na Chadi, gonakin gwaji da tawagar kwararrun aikin gona ta Sin suka kafa a wurin, suna iya samar da shinkafa sama da tan 10.03 a kan filin gona na kadada 1, adadin da ya kusan ninka matsakaicin yawan shinkafar da a kan samu a wurin har sau 3. Tawagar kuma ta gina karamar masana’antar sarrafa shinkafa, inda ta hakan ake iya “girbe shinkafa da safe, tare da sarrafa ta da tsakar rana kuma a sayar da ita da yamma”.  A Tanzania kuma, kwararrun Sin sun ingiza aikin hadin gwiwar noma mai taken “Karamin wake mai gina jiki”, wanda ya taimaka wajen kara yawan amfanin gona kamar masara da wake a yankin. Kauyukan misali 4 da kwararrun suka samar musu da taimako, sun shigar da kusan dubun mutane na yankin da kewaye cikin aikin gona, inda yabanyar wake da gonar misali ta samar ya haura kilo 400 bisa gonar eka 1, wanda ya karu fiye da ninki biyu idan an kwatanta da tsarin noma na gargajiya a wurin.  Dakin gwaje-gwajen hadin gwiwa na fasahar noman zamani tsakanin Sin da Kango Brazzaville, na “ziri daya da hanya daya” ya riga ya shigo da nau’ikan amfanin gona 59 na Sin domin yin gwaji a wurin, inda aka zabi nau’ikan masara 11, da nau’ikan wake 7 wadanda suka dace da yanayin wurin. Daga cikinsu, nau’in wake na Sin mai suna “Guixiadou 105”, ya samar da wake ton 4.2 a kowace kadada yayin aikin gwaji. Dakin gwaje-gwajen ya kuma horar da kwararrun fasahar noma na wurin har su 236.  Matakan da Sin ke dauka na hadin gwiwarta da kasashen Afirka ba kawai bayar da kudi da kaya ba ne, har ma yana gabatar da fasahohin noma, da dabarunsa, da tsarin harkokin masana’antu zuwa Afirka, domin taimaka wa manoman Afirka su dogara da karfin kansu.  Ranar 1 ga watan Mayun bana, Sin ta fara aiwatar da manufar cire haraji gaba daya kan hajojin kasashen Afirka 53 da ke da huldar diflomasiyya da ita, wanda hakan ya sa albarkatun noma masu inganci da yawa na Afirka, suke iya shiga kasuwar Sin kai tsaye ba tare da bukatar biyan haraji ba. Albarkatun noma na musamman na Afirka kamar su ridi, da kofi, da avocado da dangin gyada na kyashu duk suna shiga kasuwannin Sin, wato dai taimakon da Sin take bayarwa, ba wai kawai na “Samun karin amfanin gona”ba, har ma da “Sayar da su yadda ya kamata”.  Tabbatar da samar da isasshen abinci ba aiki ne na wata kasa guda ba ne, aikin hadin gwiwa ne na kasashen duniya baki daya, musamman ma kasashe masu tasowa. Sin a matsayin babbar kasa mai sauke nauyi, ta samarwa Afirka wata dabarar da ake iya koya, da yadawa don tabbatar da samar da isasshen abinci a duk nahiyar Afirka, ta dogaro da hanyar raba fasaha, da bude kofa, da hadin gwiwar tsarin samar da kayayyaki.  Ma’anar ranar abinci ta duniya ba wai kawai tana tunatar da mu cewa “Har yanzu akwai masu fama da yunwa” ba ne, a hannu guda tana amsa tambayar “yaya za a kawar da yunwa”. Sin ta dauki shekaru da dama wajen amsa wannan tambaya, kuma a yanzu tana taimakawa Afirka wajen amsa wannan tambaya. Hoton shinkafar da aka tagwaita irinta a kan takardar kudi ta Madagascar, da gonakin shinkafa na Chadi, da wake na Tanzania, da dakin gwaje-gwajen fasahar noma na hadin gwiwa na Kango Brazzaville, wadannan ba “ayyukan taimako” ba ne, “matakai ne na samar da kwarewar aiki”. Lokacin da manoman Afirka suke samar da isasshen abinci da hannuwansu, tabbatar da samar da isasshen abinci a duk duniya zai samu tushe na hakika. (Marubuciya: MINA) 

Shugaban kasar Sin Xi Jinping ya taya tsangayu, da dalibai, da tsoffin daliban jami’ar Hunan murnar cikar jami’ar shekaru 100 da kafuwa. Xi, wanda shi ne babban sakataren kwamitin kolin JKS, kuma shugaban hukumar koli ta rundunar sojojin kasar, ya gabatar da sakon taya murnar ne ta cikin wata wasika da ya aiki ga jami’ar.  Xi, ya kuma yi kira ga jami’ar da ta ci gaba da aiwatar da akidunta na samar da sauye-sauye, da daga matsayi da ingancin koyarwa, kana ta matse kaimi wajen kyankyashe karin masu hazaka, wadanda ka iya amfani da abubuwan da suka koya a harkokin rayuwa na hakika, ta yadda hakan zai samar da sabbin gudunmawa ga aikin gina kasar Sin, har ta kai ga zama babbar cibiyar ilimi, da ingiza salon zamanantarwa irin na Sin.  An kafa jami’ar Hunan ne a shekara 1926, ta kuma cimma nasarar yaye tarin dalibai masu hazaka a tsawon wannan karni. (Saminu Alhassan) 

Babban sakatare na kwamitin kolin jam’iyyar kwaminis ta kasar Sin, shugaban kasar, kuma shugaban kwamitin kolin soja, Xi Jinping, ya jaddada cewa ci gaba mai kiyaye muhalli, muhimmin bangare ne na ci gaba mai inganci. Ya yi kira da a daidaita ci gaba mai inganci tare da kare muhalli, da tsayawa tsayin daka kan kiyayewa da kula da tsaunuka, da ruwa, dazuzzuka, gonaki, tafkuna, ciyayi, da hamada baki daya. Ya ce ya kamata a dage wajen samar da tsarin da ya dace don rage fitar da sinadarin carbon, da dakile gurbacewar muhalli, da fadada korayen wurare, da kuma bunkasa ci gaban tattalin arziki, yayin da ake ci gaba da tsayawa tsayin daka wajen bin hanyar ba da fifiko ga kiyaye muhalli.  Xi ya bayyana haka ne yayin da ya kai ziyarci birnin Ulanqab dake jihar Mongoliya ta gida mai cin gashin kanta yau 16 ga wata.  Bayan binciken yanayin kiyaye muhalli da kuma ci gaban masana’antu masu kiyaye muhalli a Ulanqab, Xi Jinping ya jaddada cewa kasar Sin kasa ce mai girma wadda ke da bambance-bambancen yankuna a fannin albarkatun kasa. Ya ce ya kamata kowane yanki ya dogara da ci gabansa bisa yanayinsa, ya yi amfani da fa’idodin da yake da su, sannan ya inganta ci gaba mai inganci ta hanyar da ta dace da yanayin yankinsa. (Safiyah Ma) 

Ma’aikatar kula da kasuwanci ta kasar Sin ta ce bayanan da ta tattara daga rahoton shekara-shekara na 2025 kan jarin da aka zuba a kasar Sin  daga kasashen waje tare da sassan da abin ya shafa, sun nuna cewa, jimilar kudaden jari na kai tsaye da aka zuba daga kasashen waje, ya kai yuan tiriliyan 26.8. Hakan ya nuna ci gaba cikin shekaru shida a jere, kuma ya kai matsayi na biyu a duniya.  Ma’aikatar ta sanar da hakan ne yau Alhamis, yayin taron manema labarai na yau da kullum.  Ban da haka kuma, ma’aikatar kasuwancin ta sanar da cewa, kashi na farko na bikin baje kolin kayayyakin shige da fice na kasa da kasa na kasar Sin, wato “Canton Fair” karo na 140, wanda ke gudana yanzu haka a birnin Guangzhou na kasar Sin, ya mayar da hankali kan kayayyakin masana’antu na zamani. A wannan matakin, kamfanoni 12,000 suna nuna fasahohin zamani game da fasahar AI da kare muhalli da sauransu.  Ma’aikatar ta kara da cewa, Sin za ta ci gaba da aiki tare da bangaren Turai don amfani da tsarin tattaunawa kan fitar da kayayyaki, ta yadda za a bunkasa cinikayyar kayayyaki tsakanin bangarorin biyu. Bugu da kari, ta ce fahimtar da aka cimma tsakanin Sin da Turai game da ababen hawa masu amfani da makamashin man fetur da lantarki, zai samar da moriya ga bangarorin biyu.(Safiyah Ma) 

A yau Alhamis aka bude bikin baje kolin kayayyakin shige da fice na kasa da kasa na kasar Sin, wato “Canton Fair” karo na 140 a birnin Guangzhou na kasar Sin. Canton Fair ya taka rawa mai muhimmanci wajen inganta ciniki tsakanin kasar Sin da sauran kasashe.  Sakamakon wani binciken da kafar yada labarai ta CGTN ta babban rukunin gidajen rediyo da talabijin na Sin wato CMG ta gudanar, ya nuna cewa kaso 85.1% na masu bayyana ra’ayoyi sun yi imanin cewa, ta hanyar gudanar da bikin baje kolin Canton Fair a jere, Sin ta nuna kudurinta na ci gaba da bude kofa ga kasashen waje, kuma ta dade tana zuba sabon kuzari ga inganta dunkulewar tattalin arzikin duniya mai hada kai da kawo alheri ga kowa da kowa da ma ci gaba da wadata na duniya.  Bugu da kari, a wannan karo na bikin baje kolin Canton Fair, an kafa wani sashi na musamman domin gabatar da sabbin kayayyaki a karon farko. Adadin sabbin kayayyakin da aka nuna ya karu da kashi 15% idan aka kwatanta da wanda ya gabata, yayin da aka samu karuwar kusan kashi 20% a kan wasu sabbin kayayyaki na masana’antun masu tasowa, kamar na’urorin mutum-mutumin inji masu ba da hidimomi, da kiwon lafiya na zamani, da masana’antu masu amfani da fasahohin zamani, da kuma sabbin makamashi.   Kashi 85.6% na masu bayyana ra’ayoyin sun bayyana cewa, “Kayayyakin da Sin ta kera ta amfani da fasahohin zamani” na zama ginshiki mai muhimmanci ga ci gaban tattalin arzikin duniya a fannin digital da kuma fasahohin zamani.  An fitar da wannan binciken ne a dandamalin CGTN na harsunan Ingilishi da Sifaniyanci da Faransanci da Larabci da Rashanci, inda cikin sa’o’i 24, masu amfani da yanar gizo 4498 suka jefa kuri’a tare da bayyana ra’ayoyinsu.(Safiyah Ma) 

Asbitin tafi da gidanka na jirgin ruwan sojin kasar Sin “Auspicious Ark,” wanda ke gudanar da shirin kiwon lafiya na...