Ma’aikatar kula da kasuwanci ta kasar Sin ta ce bayanan da ta tattara daga rahoton shekara-shekara na 2025 kan jarin da aka zuba a kasar Sin  daga kasashen waje tare da sassan da abin ya shafa, sun nuna cewa, jimilar kudaden jari na kai tsaye da aka zuba daga kasashen waje, ya kai yuan tiriliyan 26.8. Hakan ya nuna ci gaba cikin shekaru shida a jere, kuma ya kai matsayi na biyu a duniya.  Ma’aikatar ta sanar da hakan ne yau Alhamis, yayin taron manema labarai na yau da kullum.  Ban da haka kuma, ma’aikatar kasuwancin ta sanar da cewa, kashi na farko na bikin baje kolin kayayyakin shige da fice na kasa da kasa na kasar Sin, wato “Canton Fair” karo na 140, wanda ke gudana yanzu haka a birnin Guangzhou na kasar Sin, ya mayar da hankali kan kayayyakin masana’antu na zamani. A wannan matakin, kamfanoni 12,000 suna nuna fasahohin zamani game da fasahar AI da kare muhalli da sauransu.  Ma’aikatar ta kara da cewa, Sin za ta ci gaba da aiki tare da bangaren Turai don amfani da tsarin tattaunawa kan fitar da kayayyaki, ta yadda za a bunkasa cinikayyar kayayyaki tsakanin bangarorin biyu. Bugu da kari, ta ce fahimtar da aka cimma tsakanin Sin da Turai game da ababen hawa masu amfani da makamashin man fetur da lantarki, zai samar da moriya ga bangarorin biyu.(Safiyah Ma) 

A yau Alhamis aka bude bikin baje kolin kayayyakin shige da fice na kasa da kasa na kasar Sin, wato “Canton Fair” karo na 140 a birnin Guangzhou na kasar Sin. Canton Fair ya taka rawa mai muhimmanci wajen inganta ciniki tsakanin kasar Sin da sauran kasashe.  Sakamakon wani binciken da kafar yada labarai ta CGTN ta babban rukunin gidajen rediyo da talabijin na Sin wato CMG ta gudanar, ya nuna cewa kaso 85.1% na masu bayyana ra’ayoyi sun yi imanin cewa, ta hanyar gudanar da bikin baje kolin Canton Fair a jere, Sin ta nuna kudurinta na ci gaba da bude kofa ga kasashen waje, kuma ta dade tana zuba sabon kuzari ga inganta dunkulewar tattalin arzikin duniya mai hada kai da kawo alheri ga kowa da kowa da ma ci gaba da wadata na duniya.  Bugu da kari, a wannan karo na bikin baje kolin Canton Fair, an kafa wani sashi na musamman domin gabatar da sabbin kayayyaki a karon farko. Adadin sabbin kayayyakin da aka nuna ya karu da kashi 15% idan aka kwatanta da wanda ya gabata, yayin da aka samu karuwar kusan kashi 20% a kan wasu sabbin kayayyaki na masana’antun masu tasowa, kamar na’urorin mutum-mutumin inji masu ba da hidimomi, da kiwon lafiya na zamani, da masana’antu masu amfani da fasahohin zamani, da kuma sabbin makamashi.   Kashi 85.6% na masu bayyana ra’ayoyin sun bayyana cewa, “Kayayyakin da Sin ta kera ta amfani da fasahohin zamani” na zama ginshiki mai muhimmanci ga ci gaban tattalin arzikin duniya a fannin digital da kuma fasahohin zamani.  An fitar da wannan binciken ne a dandamalin CGTN na harsunan Ingilishi da Sifaniyanci da Faransanci da Larabci da Rashanci, inda cikin sa’o’i 24, masu amfani da yanar gizo 4498 suka jefa kuri’a tare da bayyana ra’ayoyinsu.(Safiyah Ma) 

Asbitin tafi da gidanka na jirgin ruwan sojin kasar Sin “Auspicious Ark,” wanda ke gudanar da shirin kiwon lafiya na...

Sin ta fitar da bayanan cinikin shige da fice na watanni tara na farkon bana a jiya Laraba, inda kafofin yada labarai na kasa da kasa, kamar Reuters suka yi sharhi kan hakan.   Bayanan sun nuna cewa, a watanni tara na farkon bana, cinikayyar shige da fice ta Sin ta kai yuan tiriliyan 39.94, wanda ya karu da kashi 18.8% idan an kwatanta da makamancin lokacin shekarar da ta gabata. Daga cikinsu, yawan darajar kayayyakin da aka fitar daga kasar Sin zuwa ketare ya karu da kashi 16.4 %, yayin da yawan darajar kayayyakin da aka shigo da su kasar Sin daga ketare ya karu da kashi 22.3%.   A watan Satumba kadai, yawan cinikin waje ya kai yuan tiriliyan 5.16, wanda shi ne karon farko da ya zarta yuan tiriliyan 5 cikin wata daya kawai, kuma ya karu da kashi 27.5%. Matakin da ya bayyana ci gaba a bangaren yawan kayayyaki da ingancinsu baki daya, kuma an ci gaba da samun kyakkyawan ci gaba.  Cinikayyar waje wata muhimmiyar kafa ce ta duba kuzarin tattalin arzikin Sin. A watanni tara na farkon bana, karfi da kuzarin ci gaban cinikayyar waje sun kara habaka, wanda hakan ya nuna cewa ginshikan tattalin arzikin Sin na ci gaba cikin dogon lokaci ba tare da sauyawa ba, kuma Sin na da kwarin gwiwa, da ikon cimma muradun ci gaban tattalin arziki da zamantakewa na duk shekara.  A wannan rana kuwa, an bude bikin baje kolin cinikayyar shige da fice na Sin wato “Canton Fair” karo na 140 a birnin Guangzhou. Bayan shekaru 70, bikin “Canton Fair” ya zama muhimmin dandali mai amfani na Sin, a fannin fadada bude kofarta ga ketare, da ingiza gina tsarin tattalin arzikin duniya mai hade da kowa da kowa. A watan Nuwamban bana, za a gudanar da bikin baje kolin kayayyakin da ake shigowa kasar Sin daga ketare karo na 9 a birnin Shanghai dake gabashin kasar, yayin da za a gudanar da kwarya-kwaryar taron shugabannin mambobin kungiyar hadin gwiwar tattalin arziki na Asiya da tekun Pasifik wato APEC karo na 33 a birnin Shenzhen dake kudancin kasar Sin.   Duniya na kara ganin yadda kofar Sin a bude take, kuma tafiya tare da Sin tafiya ce tare da damammaki. (Amina Xu) 

A yau Alhamis, firaministan Sin Li Qiang, ya gana da shugaban Botswana Duma Gideon Boko da shugaban majalisar ministocin Togo...

A zamanin nan da muke ciki zai yi wuya a tabo ci gaban duniya, ba a ambato irin tasiri da fasahar kirkirarriyar basira ko AI ke yi ga sassan rayuwar bil’adama ba. Fasahar AI ta zamo batun tattaunawa tsakanin masharhanta, inda wasu ke jinjinawa irin alfanu da take bayarwa ga ci gaban rayuwar bil’adama, da tattalin arziki, da taimakawa hidimomi, da binciken kimiyya da fasaha da sauransu, a daya bangaren kuma, wasu na ganin baiken fasahar bisa kallo da suke yi mata, na wadda ka iya illata moriyar bil’adama ciki har da kwace guraben ayyukan yi.  Don game da hakan ne kuma, mahukuntan kasar Sin suka zabura wajen lalubo hanyoyin dakile duk wani mummunan tasiri da ake hasashen fasahar AI ka iya haifarwa ga jama’a. Alal misali, cikin manyan matakan da Sin ke dauka musamman a baya bayan nan, akwai batun aiwatar da wani shiri na bunkasa samar da guraben ayyukan yi domin tunkarar kalubalen hakan daga ci gaban AI.  Karkashin wannan manufa, gwamnatin Sin na ingiza manufofin samar da guraben ayyukan yi ta yadda Sinawa za su ci gaba da cin gajiyar manufofi mafiya dacewa da zamanin yau. A cikin wannan shekara ta 2026 kadai, kasar ta fitar da jerin kundin bayanai masu kunshe da matakai daban daban wanda za a aiwatar don cimma nasarar more ci gaban fasahohi, ciki har da AI, tare da wanzar da guraben ayyukan yin jama’a tare.  A cikin rahoton ayyukan gwamnatin kasar Sin na shekarar nan ta 2026 ma, gwamnatin kasar ta sha alwashin aiwatar da matakai masu tasiri na bunkasa samar da guraben ayyukan yi, da ciyar da sana’o’i gaba, ta hanyar yiwa fasahar AI kyakkyawan tanadi na kara shigar da ita harkokin jama’a.  Har ila yau, karkashin wani shiri na shekaru biyar dangane da aiwatar da manufar “Ayyukan yi gaban komai”, an bayyana muhimmancin bunkasa cin gajiyar fasahar AI a matsayin daya daga muhimman ayyuka, tare da kira da a fadada samar da guraben ayyuka ta amfani da fasahohin AI, da ci gaba da cin gajiyar sassan ayyukan yi na gargajiya da aka saba da su.  A halin da ake ciki, fasahar AI na ci gaba da sauya yanayin tattalin arzikin duniya, ciki har da na kasar Sin, tare da haifar da babban sauyi a kasuwar kwadago, inda ake ta ganin karin bukatar ma’aikata masu kwarewar gaske a fannin samar da hidimomin zamani.  Wasu alkaluman baya bayan nan sun shaida cewa, jarin babban sashen fasahar AI na kasar Sin ya haura kudin kasar yuan tiriliyan 1.2, wato kusan dalar Amurka biliyan 178.23, kana sama da kamfanoni 6,200 na gudanar da  hada-hada a fannin. Har ila yau, karin karbuwar fasahar AI a sassan manyan masana’antun kasar ya haura kaso 80 bisa dari.  Ba a fannin fasahar AI kadai ba, kasar Sin tana kuma fatan fadada dabarun samar da guraben ayyukan yi ga ’yan kasar ta hanyar kyankyashe damarmaki daga masana’antu masu tasowa, da ma wadanda ake fatan za su kara yin tasiri a nan gaba.  A bangaren AI, cikin shekaru biyar da suka gabata, kasar Sin ta shigar da sabbin fannoni 72 cikin jerin guraben ayyukan yi, ciki har da ayyana ma’aikata masu horaswa a fannin AI, da manajojin lura da yadda ake fitar da hayakin carbon, da hade su cikin tsarin jadawalin ayyukan yi na hukuma. Kuma tun daga farkon shekarar nan ta 2026, mahukuntan kasar sun sanar da karin wasu sabbin guraben ayyukan yi 11 a wannan fage. (Saminu Alhassan) 

A gobe Juma’a ne za a wallafa makalar babban sakataren kwamitin kolin JKS Xi Jinping, mai bayani game da matakan bunkasa dukkanin sassa, da aiki tukuru wajen aiwatar da jagorancin jam’iyyar kwaminis bisa karfin kanta, bisa babban mizanin inganci da karin matakai na tabbatar da nasarar hakan.  Za a wallafa makalar ta shugaba Xi, wanda shi ne shugaban kasar Sin kuma jagoran kwamitin kolin rundunar sojin kasar, a muhimmiyar mujallar nan ta Qiushi ta kwamitin kolin JKS fitowa ta 20 a bana.  (Saminu Alhassan) 

Saura kasa da shekara guda a bude gasar cin kofin kwallon kafa na kasashen Afirka karo na 6 na shekarar 2027. Masu karbar bakuncin gasar wato kasashe 3 dake gabashin Afirka—Kenya, Uganda da Tanzania—suna iyakacin kokari a mataki na karshe don share fagen wannan babbar gasar kwallon kafa ta Afirka. Ma’aikatan kasar Sin dake ba da taimako wajen gina manyan ababen bukatu na gasar sun zama ginshigai wajen inganta wannan gasa dake tafe.  A Kenya, filin wasa na Talanta da kamfanonin Sin ke gudanar da gininsa, zai iya daukar mutane dubu 60, kuma daya ne daga cikin manyan filayen wasa na gudanar da gasar cin kofin Afirka na 2027. Aikin ya yi amfani da fasahar rufi da ake kira a Turance da “Cable domes”, wato amfani da wasu turaku masu inganci a saman rufin ginin, fasaha ce dake sahun gaba a duniya, kuma a karon farko ake amfani da ita a nahiyar Afirka, tamkar yadda aka yi a babban filin wasa na gasar cin kofin duniya na Qatar.   Aikin dai na bukatar fasaha da ma’aikata masu matukar kwarewa. Don haka, kamfanonin Sin dake kula da wannan aiki ya bude cibiyar horaswa don bayar da ingantaccen horo bisa wannan aiki ga ma’aikatan kasar ta Kenya. A wasu lokuta, dubban ma’aikata na Sin da Kenya sun yi aiki tare ba rana ba dare. Shugaban Kenya William Samoei Ruto ya sha ziyartar wurin da ake gudanar da aiki, tare da yabawa yadda yake gudana, yana mai bayyana shi da “ Abun alfaharin kasar Kenya”.  Bugu da kari, domin tabbatar da nasarar gasar ta cin kofin Afirka na 2027, kamfanin Sin dake ba da taimakon gina filin wasan zai hada hannu da kamfanin Kenya mai gudanar da harkokin gasar don kafa wata tawaga ta musamman ta gudanarwa, don horar da ma’aikatan kwararru a cikin gidan Kenya, wadanda za su iya sarrafa na’urori, da injina masu sarkakiya, da kula da filin ciyayi na musamman, da amfani da tsarin tsaro na fasaha, domin ba da tabbaci ga gasar cikin kwanciyar hankali. Ban da wannan kuma, wannan tawagar kwararru za ta iya taka rawar gani a nan gaba a bangaren gudanarwa bayan gasar a kasar Kenya.  Matakin da kamfanin Sin ke dauka na dace sosai da taken “Shekarar musayar al’adu tsakanin Sin da Afirka” na shekarar 2026. Wasanni hanya ce mafi dacewa ta musayar al’adu, kuma filin wasa ba wurin fafatawa kawai ba ne, har ma dandali ne da matasan Afirka ke cika burinsu, kana cibiyar horaswa ba wai kawai tana ba da taimakon fasaha ga aikin ba ne, har ma dandali ne na kara karfin kwarewar ma’aikatan Kenya da kara samun aikin yi. Kafa tawagar kwararrun gudanarwa ba wai kawai za ta samar da hidima ga gasar cin kofin Afirka da ke tafe ba ne, har ma za ta baiwa Kenya kwarin gwiwa wajen gudanar da ayyuka a nan gaba. Hadin gwiwar Sin da Afirka na gudana daga “Ayyukan da ake gudanarwa” zuwa “Hadin gwiwar da za a iya ji da cin gajiyarsa”.  Gasar cin kofin Afirka ta 2027, dandali ne na Afirka, kuma taga ce ta fahimtar hadin gwiwar Sin da Afirka. Lokacin da masu sha’awar gasanni suka shiga filin wasa cikin farin ciki, abin da kafafunsu za su taka shi ne filin wasa da Sin ta gina bisa fasaharta. Daga ginin filin wasa zuwa horar da ma’aikata, daga warware matsalolin fasaha zuwa kula da filin ciyayi da amfani da tsarin tsaro, fasahar Sin na ba da kariya da inganta gasar cin kofin Afirka, wannan ba wai tabbatar da babbar gasa kadai ba ne, har ma ya kunshi hakikanin matakin da Sin ke dauka na tabbatar da hadin gwiwar Sin da Afirka, wato daga “Gina ababen more rayuwa” zuwa “Gina kwarewa cikin hadin gwiwa”. (Marubuciya: MINA) 

Wakilin dindindin na kasar Sin a MDD Sun Lei, ya gabatar da jawabi yayin wani budadden taro na Kwamitin Sulhu na MDD kan yanayin yankin Manyan Tabkunan Afrika, yana mai bukatar a dakatar da rikice-rikice a yankin.  Sun Lei ya ce kasar Sin ta kasance mai goyon bayan kokarin Jamhuriyar Demokradiyyar Congo na kare cikakken ‘yanci da hadin kai da iko kan yankunanta, kuma tana goyon bayan a warware halaltattun damuwar tsaro da kasashen yankin ke da su ta hanyar tattaunawa da tuntubar juna.  Ya ce kasar Sin na fatan Jamhuriyar Demokradiyyar Congo da Rwanda za su samu ci gaba ta hanyar marawa juna baya da aiwatar da kudurorin Kwamitin Sulhu na MDD da sauran alkawarun da suka dauka, yadda ya kamata.  Ya kara da cewa, a matsayin sahihiyar abokiya ga yankin manyan tabkunan Afrika, a shirye Sin take ta ci gaba da hada hannu da dukkan bangarori wajen bayar da karin gudunmuwa domin cimma zaman lafiya da wadata da ci gaba masu dorewa a yankin. (Mai fassara: Fa’iza Mustapha) 

An yi bikin kaddamar da cibiyar bincike ta Sin da Afrika a Afrika ta Kudu, tare da wani taron kara...