Gwamnatin Jihar Zamfara ta ƙaryata rahotannin da ke cewa fusatattun matasa sun kai wa Mataimakin Gwamnan jihar, Malam Mani Malam Mummuni, hari ko kuma yi masa ƙawanya a garin Gwashi da ke Ƙaramar Hukumar Bukkuyum. Kakakin Gwamnan Jihar, Sulaiman Bala Idris, shi ne ya fayyace hakan a ranar Litinin, 19 ga watan Oktoba, 2026, a birnin Gusau, yana mai jaddada cewa labarin da ke yawo ba shi da tushe.
Idris ya bayyana a wata tattaunawa ta musamman da manema labarai cewa mataimakin gwamnan ya kai ziyarar aiki ne garin Gwashi domin jajanta wa mazauna yankin kan harin ƴan bindiga da ya kashe jami’an tsaro tara da fararen-hula kwanan nan. Ya ƙara da cewa ziyarar ta kammala cikin nasara inda aka raba wa iyalan waɗanda harin ya shafa kayan agaji, sabanin iƙirarin cewa tawagarsa ta fuskanci farmaki ko kuma an tsare ta a garin.
Wannan bayani na zuwa ne biyo bayan rahotannin da suka bazu a ranar Lahadi cewa wasu fusatattun matasa sun toshe hanyar shiga garin suna rera taken “Ba ma yi”, sakamakon zargin gwamnati da yin jinkiri kafin kai musu ziyarar ta’aziyya. Rahotannin da suka gabata sun yi iƙirarin cewa matasan sun yi jefe da duwatsu kan ayarin motocin, lamarin da ya tilasta wa mataimakin gwamnan da jami’an tsaronsa neman maɓoya a cikin gari.
Duk da musanta aukuwar harin da fadar gwamnatin jihar ta yi, yankin Ƙaramar Hukumar Bukkuyum na ci gaba da fuskantar ƙalubalen hare-haren ƴan bindiga da ke tayar da hankalin al’umma da manoma. Gwamnatin jihar ta sake tabbatar wa al’ummar yankin cewa tana nan daram kan aniyarta ta haɗa gwiwa da hukumomin tsaro domin dawo da zaman lafiya mai ɗorewa a kowane yanki na Jihar Zamfara.
