Babbar hukumar kwastam ta kasar Sin, ta ce hada-hadar cinikayyar waje ta kasar Sin ta karu da kaso 14.2 bisa dari, a mizanin shekara-shekara a watan Afrilun da ya gabata.Wasu alkaluman da hukumar ta fitar a Asabar din nan, sun nuna yadda a watan da ya gabata, darajar hada-hadar shige da ficen hajojin kasar ta kai yuan tiriliyan 4.38, wato kwatankwacin dalar Amurka biliyan 639.4.
A cikin wannan adadi, hada-hadar fitar da hajoji zuwa ketare ta karu da kaso 9.8 bisa dari, idan an kwatanta da na makamancin lokaci na bara, zuwa yuan tiriliyan 2.48, yayin da hada-hadar shigo da hajoji kasar ta Sin ta karu, da kaso 20.6 bisa dari zuwa yuan tiriliyan 1.9.
Alkaluman sun kuma nuna cewa, a watanni hudu na farkon shekarar bana, darajar jimillar cinikayyar waje ta Sin ta kai yuan tiriliyan 16.23, adadin da ya karu da kaso 14.9 bisa dari bisa mizanin shekara-shekara.
A daya bangaren kuma, matakin kasar Sin na dakatar da karbar dukkanin haraji kan hajojin kasashen Afirka dake shigowa kasar, ya ingiza cinikayya tsakanin Sin da kasashen Afirka zuwa sabon matsayi.
Kazalika, cikin watanni hudu na farkon shekarar nan, darajar hada-hadar shige da ficen hajojin Sin zuwa kasashen Afirka ta haura yuan biliyan 800, a karon farko a tarihi, adadin da ya nuna karuwar kaso 19.4 bisa dari kan mizanin shekara-shekara. (Saminu Alhassan)
