Shugaban rukunin kamfanonin Dangote, Aliko Dangote, ya yaba wa Shugaban ƙasa Bola Ahmed Tinubu kan tasirin yarjejeniyar musanya man fetur da Naira, wadda ta rage farashin albarkatun mai a Nijeriya.
Matatar Dangote ta rage farashin man fetur daga N970 zuwa N899.50 a wurin lodin matatarsa tare da bayar da bashi ga masu sayarwa. Haka kuma, ya ƙulla yarjejeniya da MRS don sayar da man fetur a tashoshin man su kan N935 kowace lita a duk fadin Nijeriya.
- Da Dumi-Dumi: Dangote Ya Rage Farashin Man Fetur Zuwa N899 Kan Kowace Lita
- Mun Karbi Rancen Dala Biliyan 1 Don Tallafa Wa Matatar Man Dangote —NNPC
Dangote ya yi kira ga sauran masu sayar da man fetur su hada ƙai don tabbatar da cewa ‘yan Nijeriya sun samu mai me rahusa kuma da inganci. A cewarsa, matatar Dangote ta sadaukar da kanta don amfani ga ‘yan Nijeriya, tare da tabbatar da cewa kayayyakin mai suna da inganci kuma sun dace da kuɗin al’umma ke biya.
Matakin musanyar mai da Naira wanda aka fara a ranar 1 ga Oktoba ya rage matsin lamba kan Dala $ tare da daidaita farashin Naira. Dangote ya gode wa ‘yan Nijeriya bisa goyon bayansu da kuma gwamnati kan samar da yanayi mai kyau don bunƙasar masana’antar tace mai ta cikin gida.
