Daga fim din “Schindler’s List” zuwa “All Quiet on the Western Front”, fina-finan da ke nuna adawa da yaki suna sosa zukatan jama’a. A lokacin hutun zafi na kasar Sin, an gabatar da fim din Sin mai taken “Once Upon A Time in the Middle East”, wanda ya sake maimaita yadda rayuwa cikin zaman lafiya take da daraja sama da komai.
A cikin wannan fim, an bayyana labarin wani shahararren mai dafa abinci na Sin, wanda ya ceto rayuka a yankin Gabas ta Tsakiya da ke cike da yake-yake, abin da ya sosa ran jama’a. Masu kallo da yawa sun ce, wannan fim ya kasance fim mafi sosa rai da suka kalla cikin shekaru da yawa.
Wasu masana kuma, suna ganin cewa fim din ya sabawa salon fina-finai da kasashen yamma su kan gabatar dake mayar da hankali kan labarin jarumtaka, inda fim din na Sin ya mayar da hankali kan labarin fararen hula, kuma hakan ya bayyana ra’ayin da Sin take dauka na “kafa makomar bil’adam ta bai daya”, da “son zaman lafiya”, da “adawa da zalunci” sannu a hankali a cikin fim, wanda ya zama abin koyi.
Kalamai mafiya muhimmanci da aka fada a cikin wannan fim, wato “Zaman lafiya da cin abinci kadai ake iya samu a dakin cin abinci na dabbar Dragon” (fim din da ya gabatar da labarin abun da ke faruwa a cikin wannan dakin cin abinci), ya zama mabudin fahimtar wannan fim.
Masu kallo da yawa sun ce, jaruman da Amurka ke gabatarwa a cikin fina-finan Hollywood, ba su da ma’ana ko kadan duba da yadda Amurka ke yin babakere yayin da a hakika duniya ke fuskantar makoma ta bai daya. Saboda haka, tana bayyana a zahiri ko Amurka ita ce mai kiyaye zaman lafiya a duniya ko kuma ita ce mai lalata zaman lafiya, da mayar da ta da yake-yake aikinta.
A lokacin da mutanen duniya ke ganin yadda Amurka ke mayar da muradunta a gaban komai, da gudanar da manufar son kai, labarin da ra’ayoyin da Amurka ke yunkurin gabatarwa a cikin fina-finanta na zama abu marar ma’ana, ta yadda har kasashe kawayenta ke kin amincewa da hakan. (Amina Xu)
