Gwamnan Jihar Kano, Alhaji Abba Kabir Yusuf, ya buƙaci sababbin Masu Ba Da Shawara Na Musamman guda 27 da aka rantsar da su nuna cikakkiyar biyayya, sadaukarwa da tsayin daka wajen gudanar da ayyukansu.
Ya buƙace su da su tallafa wa gwamnatinsa domin cimma muradun tsarin “Kano First” da kuma manufamr “Renewed Hope” ta Shugaba Bola Ahmed Tinubu.
A cewar sanarwar da mai magana da yawun gwamnan, Sunusi Bature Dawakin Tofa, ya fitar a ranar Alhamis, Gwamna Yusuf ya bayyana cewa mutum 21 daga cikinsu sababbi ne, yayin da mutum shida kuma aka sake naɗa su ne bayan sun yi murabus a baya domin neman takarar siyasa.
Gwamnan ya ƙara da cewa an mayar da jami’an shidan ne sakamakon kyakkyawan aiki da gudunmawar da suka bayar a baya.
Gwamna Yusuf ya bayyana cewa an zaɓi sababbin masu ba da shawara 21 ɗin ne bisa cancanta, da kwarewa da kuma jajircewa ga muradun gwamnatinsa. Wannan biki na rantsarwa ya gudana ne a yayin taron Majalisar Zartarwa ta Jiha karo na 41 da aka gudanar a Gidan Gwamnati da ke Abuja.
Da suke tofa albarkacin bakinsu a madadin sauran waɗanda aka naɗa, Injiniya Abdullahi Kutama da Arc. Hauwa Hassan sun tabbatar wa gwamnan cewa za su ba da dukkan ƙoƙarinsu kuma za su yi aiki tuƙuru domin sauke nauyin da aka ɗora musu.
