Gwamnatin Tarayya ta gargaɗin cewar akwai yiwuwar aukuwar ambaliyar ruwa a wasu sassan jihohi 27 da Babban Birnin Tarayya Abuja daga tsakanin ranar 27 ga watan Satumba zuwa 10 ga watan Oktoba 2026.
Cibiyar Kula da Ambaliyar Ruwa ta Ƙasa, ƙarƙashin Ma’aikatar Muhalli ta Tarayya, ce ta yi gargaɗin.
Cibiyar ta ce ruwan sama mai yawa, cikar koguna, matsalar magudanan ruwa da yawaitar kwararar ruwa na iya haifar da ambaliya a lokacin da aka yi hasashen.
An raba jadawalin wuraren da abin ya shafa zuwa matakai uku: Mafi Munin Hatsari, Hatsari Matsakaici da kuma Wanda Ba Shi Da Hatsar Sosai.
Jihohin da ke da wuraren da aka sanya cikin Mafi Munin Hatsari sun haɗa da Benue, Kogi, Kwara, Neja, Adamawa, Bauchi, Taraba, Ribas, Edo, Delta, Kuros Riba, Bayelsa, Akwa Ibom, Abia, Anambra, Ebonyi, Enugu, Imo, Ekiti, Legas, Ogun, Ondo, Osun da Oyo.
An sanya Babban Birnin Tarayya Abuja cikin rukunin wuraren da ke cikin Hatsari Matsakaici tare da wasu yankuna ciki har da Abuja Municipal, Abaji, Bwari, Gwagwalada, Kuje, Kubwa, Nyanya, Wuse, Garki da Maitama.
Haka kuma, wasu yankunan Nasarawa, Filato, Bauchi, Taraba, Adamawa da Kebbi suna cikin rukunin.
Yayin da wasu sassan Bauchi, Borno, Gombe, Yobe, Zamfara, Sakkwato, Katsina, Kano, Kaduna da Jigawa suke cikin jerin wuraren da ake sa ido saboda yiwuwar aukuwa matsakaiciyar ambaliya.
Cibiyar ta shawarci mazauna wuraren da ke cikin hatsari da su tsaftace magudanan ruwa, sanya ido kan koguna da bututun magudanan ruwa, tare da bin umarnin hukumomi kan kwashe mutane idan buƙatar hakan ta taso.
Ta kuma gargaɗi jama’a da ka da su yi gine-gine, kasuwanci, ajiye motoci ko kaya a wuraren da ambaliya ke yawan faruwa, da bakin koguna da sauran wuraren da lamarin ka iya shafa.
An kuma buƙaci jama’a da su nesanta yara daga bakin koguna, su guji tafiya ko tuƙi a cikin ruwa mai gudana, sannan su katse wutar lantarki idan ambaliya ta taso.
Cibiyar ta kuma shawarci jama’a da su kare muhimman takardu, magunguna, abinci da ruwan sha, tare da bibiyar sauyin yanayi da umarnin hukumomin agaji.
